Link açıqlığı

Kiyevde Mustaqillik Meydanında Qırımtatar Milliy Meclisine destek aktsiyası başlandı. Bu yerde onlarca insanlar toplaştı, olarnıñ arasında uquq qoruyıcılar, Meclis azaları, ukrain deputatları, cemaat erbapları bar, olar ellerinde «meclisniñ yasaqlanması, halqnıñ yasaqlanmasıdır» şiarınen levhalarnı tuta, dep bildire Qırım.Aqiqat mühbiri.

Beklenilgenine köre, bu kibi aktsiyalar dünyanıñ diger şeerlerinde de keçirilecek. Latviyada Ukraina elçiliginde, qırımtatarlarğa destek olaraq, qırımtatar bayrağı tiklenildi.

Radio Svoboda mühbiriniñ bildirgenine binaen, Moskvada Meclisniñ yasaq etilmesi boyunca mahkeme toplaşuvı açıldı. İmaye adliyecileri – Marina Agaltsova ve Kirill Koroteyev.

Sentâbr 29-da, cumaaqşamı künü saat 11.00-de Rusiye Yuqarı mahkemesinde «Qırımtatar Milliy Meclisi» cemaat birleşmesi faaliyetiniñ yasaq etilmesi aqqında» işi boyunca, «Ekstremistik faaliyetke qarşılıq aqqında» Federal Qanunnıñ 25.07.2002 qabul etilgen 1145-FQ sanlı 9-cı maddesine esaslanıp, toplaşuv keçirile.

Aprel 26 Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG