Link açıqlığı

Meclis yolbaşçıları ve azaları Rusiye Yuqarı mahkemesiniñ Meclisniñ yasaq etilmesi boyunca toplaşuvında iştirak etmemege qarar aldı. Bu aqta Qırımtatar Milliy Meclisi reisiniñ birinci muavini Nariman Celâl Facebook saifesinde yazdı.

«Bizim bulunmağanımız – bu qattı siyasiy noqta-i nazarınıñ numayışıdır. Rusiye Federatsiyası Yuqarı mahkemesinde bulunmayıp, böyle etip, halq tarafından saylanılğan tamır qırımtatar halqınıñ temsilci organınıñ faaliyetine rusiyeli ükümetniñ mania olmaq (yasaq etmek) aqqına qarşı olğanımıznı; rusiyeli qanunlarnı bozıp, ükümet tarafından teşkil etilgen siyasiy taqiplarda iştirak etmege azır olğanını bir qaç sefer köstergen rusiyeli adliyege iç işanmağanımıznı; rusiyeli «adliyeniñ» qurbanları olğan siyasiy mabuslarnen birlik olğanımıznı kösteremiz», – dep qayd etti o.

Celâlnıñ qayd etkenine köre, mahkemede Meclisniñ menfaatlarını «Memorial» uquq qoruyıcı merkeziniñ adliyecileri imaye etecek.

Sentâbr 29-da, cumaaqşamı künü saat 11.00-de Rusiye Yuqarı mahkemesinde «Qırımtatar Milli Meclisi» cemaat birleşmesi faaliyetiniñ yasaq etilmesi aqqında» işi boyunca, «Ekstremistik faaliyetke qarşılıq aqqında» Federal Qanunnıñ 25.07.2002 qabul etilgen 1145-FQ sanlı 9-cı maddesine esaslanıp, toplaşuvnıñ keçirilmesi planlaştırıla.

Aynı vaqıtta Kiyevdeki Mustaqillik Meydanında Mecliske destek aktsiyasınıñ keçirilmesi planlaştırılğan. Teşkilâtçılarnıñ ilân etkenlerine binaen, bu kibi mitingler diger devletlerde de rusiyeli ilçilikler yanında keçirilecek.

Aprel 26 Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG