İşğal etilgen Qırımda siyasiy mabuslar em cemaat teşkilâtlarınıñ, em de devletniñ destegine muhtac. Böyle fikirni Qırım.Aqiqat Radiosınıñ saba yayınında «Qırım siyasiy mabuslarına yardım fondu» birleşmesiniñ idarecisi Ayşe Umerova bildirdi.
«Adamlar, devlet tarafını tutıp, ukrain tarafını tutıp, öz noqta-i nazarını ve 2014 senesi bozulıp başlağan halqara uquq qaidelerini qorçalağanları içün qıynala. Devlet bunda iştirak etmeli. Bu, repressiyağa oğratılğan qorantalarnıñ probleması degil»,– dedi o.
Ayşe Umerovanıñ fikrince, yarımada toprağında repressiyalar ziyadeleşe bile, ve Meclisniñ yasaq olunuvı «bütün qırımtatar halqınıñ yasaq etilmesidir».
«Çeşit seviyeli Meclislerniñ doğru azaları olğan eki yarım biñ insan. Ve biz umumen bütün qırımtatar halqı aqqında aytamız, çünki bütün bu Meclis azaları, Qurultay delegatları ve Qırımtatar Milliy Meclisi yuqarı organı demokratik yolnen saylanıldı, er insannıñ buña nasıldır bağı bardır», – dedi o.
Aprel 26 Rusiyege boysunğan Qırım Yuqarı mahkemesi Meclisniñ işğal etilgen yarımada territoriyasında faaliyetini yasaq etti. Dünya toplulığı rusiyeli ükümetniñ böyle areketlrine qarşı qattı narazılıq bildirdi. Meclisniñ imayesi Rusiye Yuqarı mahkemesine şikâyet arizasını yolladı.
«Freedom House» programmalarınıñ idarecisi Metyü Şaaf Qırımda insan aqları saqlanuvı ep kerginleşkenini qayd etti, o yarımadada halqara teşkilâtlarnıñ bulunması kerek olğanını bildirdi.
İşğalden soñ Qırımda mustaqil mühbirlerde, qırımtatar faallerinde ve Meclis azalarında kütleviy tintüvler sıq-sıq keçirilip başladı. Ukraina Tışqı işler nazirligi (TİN) işğal etilgen Qırımda ukrain vatandaşlarınıñ taqip etilmesinden qasevet çekkenini bildirdi ve basqıncılıqnı toqtatmağa çağırdı.
