Qırımtatar Milliy Meclisi azası Ali Hamzinge rusiyeli Qırım mahkemesi 1000 ruble para cezasını belgiledi.
Bu aqta, Hamzinniñ sözlerine esaslanıp, Qırımtatar Milliy Meclisi reisiniñ birinci muavini Nariman Celâl Facebook saifesinde bildirdi.
«Ali Hamzinniñ sözlerine binaen, oña, faaliyeti toqtatılğanı aqqında qarar alınğan cemaat birleşmesiniñ toplaşuvında iştirak etkeni içün, 1000 ruble para cezası belgilendi», – dep yazdı Celâl.
Bundan evel Nariman Celâl Facebook saifesinde bildirdi ki, sentâbr 27-de aqşam, soravdan soñ, Ali Hamzinge Bağçasaray ROVD, E merkezi hadimleriniñ iştiraginen, Rusiye Memuriy Kodeksiniñ «Faaliyeti toqtatılğanı aqqında qarar alınğan cemaat ya da din birleşmesiniñ faaliyeti teşkil etilmesi» 20.28 maddesiniñ 1-ci qısmı bozuluvında qabaatlavnı taqdim ettiler.
Sentâbr 26-da Qırımtatar Milliy Meclis azaları, bunen beraber, Qırımtatar Qurultayınıñ bazı delegatları Aqmescitteki Ekstremizmge qarşılıq boyunca merkezge çağırıldı.
Nariman Celâlnıñ bildirgen malümatına binaen, bir qaç insan körüşüvge razı oldı, digerleri ise, resmiy vesiqanı beklemekni sayladı.
«Uquq qoruyıcılar Meclis azaları Ablayev Emirali, Yakubov Ruslan ve Ayder Acımambetovnıñ vekâletleri toqtatılğanı, bunen beraber, soñkisiniñ Meclis reisi muavini vazifesinden boşatılması aqqında yaqında qabul etilgen Meclisniñ qararlarınen meraqlana», – dep yazdı Celâl Facebook saifesinde.
