Sentâbr 26-da Aqmescit-Kefe yolunda, çoqusı qırımtatarlar yaşağan Boğurça (Kamenka) qasabası yanında ortodoks haç tiklenildi.
Bu aqta Qırımtatar Milliy Meclisi azası Gayana Yüksel Facebook saifesinde bildirdi.
«Demek ki, islâm dinini kütken qasaba sakinleri endi haç tübünde yaşay. Haçnı bir qaç ay evel tiklemege tırıştılar, amma o vaqıt qırımtatarlar çıqtı, olar qarşı oldı. Politsiya kelgen edi. O vaqıt tiklemege bermediler», – dep yazdı Yüksel.
Qırımnıñ ameldeki ükümet ve haç tiklenilmesinen bağlı olğan cemiyetniñ izaatları daa yoq.
Bu sene iyül ayında Qırım ve Sevastopol musulmanları diniy idaresi (QMDİ) Aqmescit kirişinde, qırımtatarlar toplu yaşağan qasaba yanında ibadet etilecek haçnıñ tiklenilmesine qarşı narazılıq bildirdi.
Bundan evel kazak cemiyetleriniñ teşebbüsi ile yarımadada onlarca ibadet etilecek haçlar tiklenildi. Farqlı yıllarda, 2000 senesinden başlap, bu, diger dinler temsilcileri tarafından narazılıqnıñ peyda olmasına sebep olğan.
2014 senesi avgust ayında, işğalden yarım yıl keçken soñ, haç Bağçasaray rayonındaki Tav Badraq (Skalistoye) köyünde yol kenarında peyda oldı, evel o yerde, qırımtatarlarnıñ fikrince, eski qırımtatar mezarlığı bar edi. 2015 senesi oktabr ayında eñ büyük, yüksekligi 7 metr, ağırlığı 6 tonna olğan haç Nikolayevka kirişinde qoyuldı. 2016 senesi aprel ayında ibadet etilecek haç Sudaqta, mayıs ayında ise, birden üç haç Aqmescitniñ Yalta tarafından kirişinde, Eski Orda (Lozovoye) ve Anğarada (Perevalnoye) tiklenildi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
