Link açıqlığı

«Açıq Dialog» fundatsiyası qırımtatarlarğa qarşı etilgen repressiyalar aqqında maruzanı derc etti


«Açıq Dialog» fundatsiyası «LetMyPeopleGo» uquq qoruyıcı kampaniyası çerçivesinde «Qırımda qırımtatar halqınıñ liderlerine qarşı repressiyalar» maruzasını derc etti.

Maruzada «qırımtatar halqınıñ Meclisi ve onıñ eñ parlaq erbaplarına qarşı rusiyeli ükümet tarafından etilgen repressiyalarnıñ qurbanları olğan» Ahtem Çiygoz ve İlmi Umerov aqqında söz yürsetile.

«Olarğa qarşı cinaiy işler siyasiy ve evelden yapılğan ola, ve bunıñ maqsadı, qırımtatar liderlerini itibardan tüşürmektir. Halqara cemaatçılıq, Rusiye tarafından Qırım yarımadasınıñ tamır halqına qarşı yapılğan cinaiy terrornı toqtatmaq içün, vaziyetke qarışmaq ve Meclis liderlerini qorçalamaq kerek», – dep qayd etile maruzada.

Uquq qoruyıcılar, maqsatqa irişmek içün konkret adımlarnı belgiledi. Hususan, Rusiyede ve işğal etilgen Qırımda siyasiy mefküre sebebinden qanunsız cinaiy taqip etilgen ukrain vatandaşlarını qorçalama boyunca LetMyPeopleGo halqara kampaniyasına malümat, siyaset ve maliye taraflarından destek köstermeli.

Bundan da ğayrı, maruzada Qırımtatar Milliy Meclisi azaları ve Qırım musulmanlarına qarşı açılğan cinaiy işler aqqında tafsilâtlı malümat bildirile.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay. Ahtem Çiygoz mahkemede özüni qabaatlı tanımadı.

İşğal etilgen Qırımda rusiyeli uquq qoruyıcı organları İlmi Umerovğa qarşı «separatizm» maddesi boyunca cinaiy iş açtı. Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. O, psihiatrik hastahanege avgust 18-de ketirildi. Sentâbr 7-de İlmi Umerov klinikadan çıqtı.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG