İşğal etilgen Qırımdan Rusiye Federatsiyası Devlet Dumasınıñ deputatı altı kişi oldı, olarnıñ episi «Yedinaya Rossiya» firqasından namzet edi. Deputatlarnıñ adları Rusiye Merkeziy saylav komissiyasınıñ saytında derc etildi.
Böyle etip, partiya cedvelleri boyunca Dumağa Kremlge boysunğan Qırım baş nazir muavinleri Mihail Şeremet ve Ruslan Balbek, bunen beraber, Qırımnıñ rusiyeli prokurorı Natalya Poklonskaya keçti.
İşğal etilgen yarımadada «Yedinaya Rossiya» firqasınıñ başında olğan Rusiye tarafından tayinlengen Qırım yolbaşçısı Sergey Aksönov deputatlıq mandatından vazgeçti.
Daa dört deputat bir mandatlı saylav okruglarında saylandı.
19 sanlı Aqmescit saylav okrugından (SO – QA) Kreml tarafından tayinlengen Qırım spikeriniñ muavini Andrey Kozenko keçti.
20 sanlı Keriç SO-nı Kreml tarafından tayinlengen Qırım spikeriniñ birinci muavini Konstantin Baharev temsil etecek.
21 sanlı Kezlev SO-dan Rusiyege boysunğan Qırım medeniyet ve medeniy asabalıq saqlavı boyunca komitetiniñ reisi Svetlana Savçenko deputat oldı.
219 Aqyar SO-da «BİG-KRIM» teşkilâtınıñ müdir muavini Dmitriy Belik deputat oldı.
Sentâbr 18-de, bazar künü Rusiyede Devlet Dumasına saylavlar keçirildi. Moskva rey berüvni işğal etilgen Qırımda da keçirmege qarar aldı, bunı ise, Kiyev ve bir sıra Çarp devletleti qattı tenqit etti.
Ukraina Yuqarı Radası sentâbr 20-de «Ukraina Rusiye Federatsiyası yedinci çağıruv Federal Toplaşuvı Devlet Dumasına saylavlarnıñ, bunıñ neticeleriniñ ve uquqiy aqibetleriniñ, veyedinci çağıruv Federal Toplaşuvı Devlet Dumasınıñ terkibi, vekâleti, qararlarınıñ qanuniy olğanını tanımağanı munasebetinen Ukraina Yuqarı Radasınıñ beyanatı aqqında» qarar leyhasını qabul etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
