Link açıqlığı

Rusiye Devlet Dumasına saylavlarda «Yedinaya Rossiya» firqa cedveli boyunca nazmet Kreml tarafından tayinlengen Qırım yolbaşçısı Sergey Aksönov deputat olmaqtan vazgeçti. Bu aqta o Aqmescitte keçirilgen brifingde ilân etti, dep bildire RİA Novosti agentligi (Qırım).

«Saylavlardan evel de aytqan edik ki, Devlet Duması deputatı olmağa planlaştırmayım ve olmaycam, mandatnı red etem», – dep ayttı Aksönov.

Aksönov qayd etti ki, rusiyeli Devlet Dumasında deputatlıq vazifelerini oña «kimse bermedi» ve «icra ükümeti yolbaşçılarına nisbeten vazifelerni prezident (Rusiye prezidenti – QA) çeze».

«Bu, partiyağa qol tutuv usulı edi. Maña bundan evel prezident aytır edi: demek ki, sen anda baracañ. Böyle vazife yoq edi. Menim vazifem 2019 senesine qadar Qırım meselelerini çezmektir», – dep ayttı Aksönov.

Rusiye tarafından tayinlengen Qırım yolbaşçısı Sergey Aksönov işğal etilgen Qırımda Devlet Dumasına saylavlarda «Yedinaya Rossiya» firqasından namzetler regional cedveliniñ başında edi. Bundan evel o bir qaç sefer yarımadanı terk etmege planlaştırmağanı ve mandatnı red etecegi aqqında bildirgen edi. Cedvelde ekinci ve üçünci yerde – Kremlge boysunğan Qırım baş naziriniñ birinci muavini Mihail Şeremet, Qırım baş naziriniñ muavini Ruslan Balbek yerleşti. Dörtünci yerde – rusiyeli Qırım prokurorı Natalya Poklonskaya.

Sentâbr 18-de, bazar künü Rusiyede Devlet Dumasına saylavlar keçirildi. Moskva rey berüvni işğal etilgen Qırımda da keçirmege qarar aldı, bunı ise, Kiyev ve bir sıra Çarp devletleti qattı tenqit etti.

Ukraina Yuqarı Radası sentâbr 20-de «Ukraina Rusiye Federatsiyası yedinci çağıruv Federal Toplaşuvı Devlet Dumasına saylavlarnıñ, bunıñ neticeleriniñ ve uquqiy aqibetleriniñ, veyedinci çağıruv Federal Toplaşuvı Devlet Dumasınıñ terkibi, vekâleti, qararlarınıñ qanuniy olğanını tanımağanı munasebetinen Ukraina Yuqarı Radasınıñ beyanatı aqqında» qarar leyhasını qabul etti.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG