Link açıqlığı

Saatnıñ esas haberi

Qırımtatarlar Devlet Dumasına saylavlarnı boykot etti – Umerov


İlmi Umerov
İlmi Umerov

Qırımtatarlar işğal etilgen Qırımda rusiyeli Devlet Dumasına saylavlarnı boykot etti. Bu aqta Qırımtatar Milliy Meclisi reisiniñ muavini İlmi Umerov Facebook saifesinde yazdı.

«Qırımtatarlar Devlet Dumasına saylavlarnı boykot etti – bu kösterici ve müimdir, bu noqta-i nazar, narazılıq, fikir köstermesidir, amma cinayet degil. Bu vaziyette cinayetni mustaqil devletniñ qısmını işğal etken, işğalci ükümetni tizgen, bu territoriyada arbiy küçlerni çoqlaştırğan, ve... çoq tenbige baqmadan, tanılmağan, ecnebiy, diger devletniñ mülkü olğan topraqta bütün Rusiye Federatsiyasnınen beraber devlet dumasına saylavlarnı teşkil etken ve keçirgen kimseler yaptı...» – dep yazdı Umerov.

Bunen beraber, İlmi Umerov Ukraina ükümetini Devlet Dumasına saylavlarnıñ neticelerini tanımamağa çağırdı.

Bundan evel Aqmescitteki 266 sanlı bölük saylav komissiyasınıñ reisi Yelena Agapova bildirdi ki, işbu saylav bölüginde qırımtatarlar saylavlarnı körmemezlikke urdı.

Qırımda parlament saylavları, yarımada 2014 senesi Rusiye tarafından işğal etilgen soñ, ilk sefer keçirile.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG