Qırımtatarlarnı sentâbr 18-de keçirilecek Rusiye Devlet Dumasına saylavlarda iştirak etüvge celp etmek ıntıluvı, «halqnı deñiştirme para olaraq qullanmaq ıntıluvdır», dep aytıla Ahtem Çiygoznıñ beyanatında, bunı onıñ adliyecisi Nikolay Polozov Facebook saifesinde paylaştı.
«Bu, qanunsız Qırım işğalini qabul etmegen qırımtatarlarnıñ siyasiy ve ahlâq noqta-i nazarlarına da zıt kele», – dep qayd ete Çiygoz.
Beyanatta qayd etilgenine köre, qırımtatarlar «çoq qıyınlıqlardan keçti, amma sınmadı».
«Elbet, bizden bazıları elâk olacaq, bir qısım da, halqnıñ serbestlik aqqı ve öz kelecegini nasıl qurmaq saylama aqqını qorçalap, kene de sürgün etilecektir! Amma «halqlar apishanesinde», «qırımtatarlar öz kelecegini Rusiyenen bağlamaq kerek» dep, yaşamaycaq», – dep aytıla beyanatta.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Rusiye mahkemesi «Çiygoznıñ işini» «fevlral 26 işi» çerçivesinde, iyül 20-de mahkeme qapalı toplaşuvda «fevral 26 işini» ekige bölgen soñ oldı: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Ahtem Çiygoz mahkemede özüni qabaatlı tanımadı.
Sentâbr 7-de eki zararlanğan kişi – Bızin ve Şparev – mahkeme toplaşuvı keçirilgen vaqıtta bildirdiler ki, Ahtem Çiygoznı mitingde körmedi ve onıñ teşkil etüvde rolü aqqında bir şey bilmeyler.
Sentâbr 8-de «Çiygoznıñ işi» boyunca daa eki zararlanğan kişi de – Nesterov ve Petrovskiy – ayttılar ki, Ahtem Çiygoznı fevral 26-da mitingde körmedi ve onıñ merasimniñ teşkil etilüvinde ve keçirilmesinde rolü aqqında bir şey bilmey.
