Rusiye Milliy gvardiyanıñ Federal ordu hızmetinde Keriç boğazında köpürni ola bilecek terroristik ücümlerden ve diversantlarnıñ reydlerinden qorumaq içün arbiy akvalangistler taqımını teşkil ete. Bu aqta, rusiyeli uquq qoruyıcı müessiselerinde şahsiy menbalarnıñ malümatına esaslanıp, rusiyeli «İzvestiya» gazetası bildire.
Haber etilgenine köre, askerler zemaneviy oq silâsınen teminlenecek, bundan da ğayrı, olarğa tez yürgen katerler, suv altında çalışqan nezaret aletleri taqdim etilecek. Arbiy akvalangistler içün yañı programma işlep çıqarıldı.
«Şimdiki vaqıtta ordu bölüginiñ teşkil etilmesi aman-aman yekünlendi. Arbiy hızmetçiler birden Keriç köprü qurucılıq obyektleri qorumasına buyuracaq ve onıñ quruvı yekünlengen soñ bu vazifeni devam etecek, – dep bildirdi adını aytmağan rusiyeli uquq qoruyıcı organlarınıñ hadimi.
Keriç köprüni qorumaq içün teşkil etilgen arbiy akvalangistler taqımı aqqında malümat Rusiye gvardiyası ve «Qırım köprü» haber merkeziniñ saytlarında şimdilik bildirilmey.
Keriç boğazından köpür qurulmasınıñ kerekligi aqqında Putin ta 2014 senesi, işğalden soñ aytqan edi. Köpürni 2018 senesine qadar qurmağa, 2019 senesi yazda işke tüşürmege vade etken ediler.
İyül başında «Krımskiy most» haber agentligi Rusiyeden Qırımğa Keriç boğazında köpür qurulmasınıñ umumiy fiyatı 227,92 milliard ruble teşkil etecegini bildirgen edi. Bundan evel bildirilgen edi ki, Rusiye ükümeti Keriç boğazında köpürniñ demiryol qısmınıñ vaqtınca işke tüşürilmesiniñ başlanuvını bir yılğa, yani 2018 dekabr ayından 2019 senesi dekabr ayına keçirdi.
Ukraina Rusiyenen Keriç köprüniñ qurulışı ile bağlı añlaşmadan 2014 senesi, Rusiye Qırımnı işğal etken soñ çıqtı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
