Link açıqlığı

Refat Çubarov: Qırımdaki saylavlarnıñ boykot etilmesi – er kesniñ köstere bilecek qarşılıq şeklidir


Refat Çubarov, arhiv fotoresimi

Qırımtatar Milliy Meclisiniñ reisi Rusiye işğal etken Qırım sakinlerine muracaat etti. O, yarımadada Rusiye Devlet dumasınıñ qanunsız saylavlarınıñ keçirilmesi içün yapılğan bütün azırlıqlarnı boykot etmege çağırdı.

«Halqara uquqqa zıt ketip ve halqara teşkilâtlarnıñ tenbilerine baqmayıp, Rusiye Federatsiyası Devlet duması saylavlarını işğal altındaki Qırımda da keçirecek ola», – dep ayttı Çubarov.

O, Rusiyeniñ saylavlarnı Qırımda keçirmek niyetini «qanunsız ve cinaiy» tanıp, saylavlarnıñ teşkilâtçılarını «cinayetçi» dep adladı.

«Rusiye Federatsiyası işğal olunğan Qırımda teşkil etken saylavlarınıñ uquqqa uymağanını ve cinayet olğanını añlap, olarnıñ keçirilmesini 2014 senesi mart 16-da Rusiye tarafından yapılğan sahte referendumnıñ neticelerini tasdıqlaycaq yañı teşviqat delili olaraq qullanmağa planlaştıra», – dep qayd etti Refat Çubarov.

Çubarovnıñ aytqanına köre, yarımada sakinlerini «azırlanğan yañı cinayet yapılmasına celp etecek olalar». O, Rusiyeniñ yapqanları neticesiz olacağını işaretledi.

ATR Channel

​Refat Çubarov hatırlattı ki, iç kimseniñ saylavlarda iştirak etmege mecbur etmek aqqı yoq, bunı Rusiye Federatsiyasınıñ qanunları da köstere.

Saylavlarnıñ boykot etilmesi – Rusiye işğalcilerine er kesniñ köstere bilecek ve er bir namuslı insanğa lâyıq olğan barışıq zorbalıqsız bir qarşılıq şeklidir

«2016 senesi sentâbr 18 künü saylavlarınıñ boykot etilmesi – Rusiye işğalcilerine er kesniñ köstere bilecek ve er bir namuslı insanğa lâyıq olğan barışıq zorbalıqsız bir qarşılıq şeklidir. 2016 senesi sentâbr 18 künü saylavlarınıñ boykot etilmesi – siyasiy mabus ve qorantalarına qoltutuvımızdır. 2016 senesi sentâbr 18 künü – Qırımnıñ saylav noqtalarında kimse olmamalı. Sentâbr 18-de Rusiye işğalcileri ana toprağımıznı aşıq-aşıqa terk etmezden evel qırımtatar halqı ve Qırım vatanperverleriniñ kerçek birligini köstereyik», – dep ayttı Refat Çubarov.

Rusiye Federatsiyasınıñ Devlet duması saylavları sentâbr 18-de qarışıq sistema boyunca keçirilecek: 225 deputat firqa cedvelleri, 225 deputat bir mandatlı bölgelerde saylanacaqtır. İlk sefer işğal altındaki Qırımda rey berilecektir.

Ukraina Yuqarı Radası çetel devletleriniñ parlamentleri ve halqara teşkilâtlarına muracaat etip, işğal etilgen Qırımda Rusiye Devlet duması saylavlarınıñ ketişatını közetmemege ve olarnıñ neticelerini kesen-kes tanımamağa çağırdı.

Rusiye prezidenti Vladimir Putinniñ matbuat kâtibi Dmitriy Peskov sentâbr 8-de bildirdi ki, Rusiye çetel devletleriniñ Qırımda olıp keçken saylavlar neticelerini tanımaqtan vazgeçkenini qulaq asmaycaq.

XS
SM
MD
LG