Link açıqlığı

Saatnıñ esas haberi

Yuqarı Rada dünyanı Qırımda Rusiye Devlet Dumasına saylavlarnı tanımamağa çağıra


Ukraina Yuqarı Radası ecnebiy devletler parlamentlerine ve halqara teşkilâtlarğa Rusiye Devlet Dumasına saylavlarnıñ Qırımda keçirilmesini nezaret etmekten vazgeçmege muracaat ete, bunen beraber, er angi şaraitte bunıñ neticeleriniñ tanımamağa çağıra.

Sentâbr 8-de, cumaaqşamı künü mütenasip qararnıñ qabul etilmesi içün 269 halq depupatı rey berdi, eñ azdan 226 rey olmaq kerek edi.

Ukrain parlamentariylerniñ qayd etkenlerine köre, uquq qoruyıcılar, Qırımğa bu saylavlarnı nezaret etmek içün kelmege qarar alğan bütün ecnebiylerge qarşı Ukrainanıñ vaqtınca işğal etilgen territoriyasına kiriş qaidelerini bozğanı içün cinaiy iş açacaq.

Bundan da ğayrı, Yuqarı Rada ecnebiy devletler parlamentlerine Rusiye Devlet Dumasına saylavları neticelerini, olarnıñ Qırımda keçirilgeni sebebinden, qabul etüv qanunsız olğanı aqqında resmiy beyanatlarnı derc etmege rica etti.

Sentâbr 18-de keçirilmesi planlaştırılğan Rusiye Devlet Dumasına saylavlar qarışıq sistema boyunca teşkil etilecek: 225 deputat firqa cedvelleri boyunca, 225 deputat bir mandatlı okruglar boyunca saylanacaq. İlk sefer rey berüv işğal etilgen Qırımda da keçirilecek.

Ukraina Tışqı işler nazirligi bildirgen edi ki, rey berüv qanunsızdır, ve deputatlıqqa Qırım namzetlerine qarşı mütenasip tedbirler alıp barılacaq. Kiyevde Qırım Muhtar Cumhuriyeti prokuraturası ilân etti ki, Qırımda saylavlarnıñ teşkil etilmesinde iştirak etken şahıslarğa qarşı cinaiy işler açılacaq.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG