İnsan aqları boyunca Qırım kontakt gruppasınıñ idarecisi Abdureşit Cepparovnıñ fikrince, bücet saasında çalışqan qırımtatarlarnıñ bir qısmı, işten çıqaruv qorqusından, sentâbr 18-de Rusiye Devlet Dumasına saylavlarda iştirak etmege mecbur olacaq.
«Saylavlarğa qadar 10 kün qaldı. Sentâbr 18-de saylavlar, elbet, men barmaycam. Vaqtım bar ve rusiyeli pasportım da bar, em de saylav bölügi yanında yaşayım, amma printsip olaraq barmaycam, çünki yüzümni coymağa istemeyim. Bilem ki, bazı adamlar baracaq. Barmağa isteyler, dep aytıp olamayım, amma qırımtatarlar da baracaq. Tabi olğan ealiniñ qısmı baracaq. Meselâ, bücet saasında çalışqanlar, olar işni coymaq qorqusından barmaq mecburlar», – dep añllattı Abdureşit Cepparov Qırım.Aqiqatqa.
Cemaat erbabınıñ malümatına binaen, iş bergen tarafından basım yapıla.
«Adamlarğa böyle de aytalar – saylavlarğa barmasañız, işten çıquv aqqında ariza yazıñız. Ne yapmalı? Men olarnı aqlamayım, amma añlayım ki, bu adamlar saylavlarğa barmasa, kelir menbasından marum qalacaq. Bu adamlar – vaziyet reineleridir, yani isteksiz reineler baracaq. Amma normal, azat adamlar barmaycaq», – dep qayd etti uquq qoruyıcı.
Sentâbr 18-de keçirilmesi planlaştırılğan Rusiye Devlet Dumasına saylavlar qarışıq sistema boyunca teşkil etilecek: 225 deputat firqa cedvelleri boyunca, 225 deputat bir mandatlı okruglar boyunca saylanacaq. İlk sefer rey berüv işğal etilgen Qırımda da keçirilecek.
Qırımtatar Milliy Meclisi reisi Refat Çubarov işğal etilgen Qırım sakinlerini rusiyeli Devlet Dumasına qanunsız saylavlarnıñ keçirilmesi teşkil etilmesiniñ bütün basamaqlarını boykot etmege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
