Ukraina Haber siyaseti nazirligi «separatizm» ile qabaatlnağan Qırımtatar Milliy Meclisi reisiniñ muavini İlmi Umerovğa qarşı yapılğan repressiyalarğa bağışlanğan video taqdim etti. Video ukrain nazirliginiñ resmiy saytında yerleştirildi.
«Bu ingliz tilindeki video – avropalı uquq qoruyıcı müessiselerine, kütleviy haber vastaları temsilcilerine ve ukrain diplomatlarına mesajdır. Olarnıñ destegine ve videonıñ maksimal paylaşmasına ümüt besleymiz», – dep bildirdi Ukraina haber siyaseti nazirniñ birinci muavini Emine Ceppar.
Nazirlikte qayd ettiler ki, videoda «öz halqınıñ menfaatını qorçalap, noqta-i nazarı içün soñki nefeske qadar turmağa azır olğan, böyle etip, öz noqta-i nazarınen Qırım – Ukraina olğanını tasdıqlağan İlmi Umerov aqqında dünyağa bilmege yardım etecek» malümat bar.
Bunen beraber, videoda qayd etile ki, İlmi Umerov qırımtatarlarnıñ vatanğa avdeti içün bütün ömür boyunca küreşti, Qırımtatar Milliy Meclisinde yüksek vazifelerde buluna edi.
Rusiyeli uquq qoruyıcı organları bu sene mayıs ayında İlmi Umerovğa qarşı «separatizm» maddesi boyunca cinaiy iş açtı. Avgust 11-de mahkeme zalında İlmi Umerovnıñ alı yaramaylaştı. Ekimler onı infarkt havfı ile hastahanege ketirdi. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar psihiatrik-mahkeme ekspertizadan keçirilmesi aqqında qarar aldı. Onı avgust 18-de psihiatrik hastahanege ketirdiler. Mahkeme-psihiatrik ekspertizanıñ neticesini belgilecek ekimler komissiyasınıñ toplaşuvı sentâbr 7-de keçirilecektir.
İlmi Umerovnıñ imayecileri tahmin etkenlerine köre, endi kelecek afta Umerovnıñ tedaviylenüv içün kardiologiya bölügine keçirilmesi aqqında şefaat arizasına cevap kelecektir. Ailesi onıñ ağır alda bulunğanı aqqında bildire.
«Memorial» rusiyeli uquq qorçalayıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.
