2014 senesi fevral 26-da «kütleviy nizamsızlıq teşkil etüv» içün rusiyeli ükümet tarafından Qırımda mahküm etilgen Ahtem Çiygoznıñ apayı Elmira Ablâlimova sentâbr 5-te Çiygoznıñ muracaatını halqqa bildirdi, muracaatta Meclis reisiniñ muavini destek içün teşekkr bildire, onıñ sözlerine köre, bu oña «küç ve sabır» bere.
«Aqmescit taqiq izolâtorında bulunğanımnıñ 18-ci ayı başlandı. Çoq insan sağlığım ve alım içün qasevetlene... Elbet, yaqınlarnı ve soy-sopnı körmeyip, torunlarnıñ öskenine baqmayıp, olarnı körmege imkân yoq olğanda, esli başlı ana-babamnı körecemmi-yoq bilmeyip, kün künden bu yerde, apiste bulunmağa ağırca ola... Bütün bu fikirlerden bazı pek ağır ola», – dep aytıla beyanatta.
Çiygoznıñ sözlerine köre, qıyınlıqlarğa baqmadan, onıñ teslim etilmege niyeti yoq.
«Er şey bitsin dep, neler yapmaq kerek olğanını bir tüşünsem, yüzsüz ve pezevenkler, satqın kiçik adamçıqlar ögünde tiz çökmek, öz noqta-i nazarını deñiştirmek, özümi ve bütün qırımtatar halqını masqara etmek kerek olğanı aqqında tek bir fikirden qanım qaynay! Halqımnıñ ve bütün dünyadaki çoq insannıñ destegi maña küç ve sabır bere. Er kes sağ olsun», – dep bildirdi Ahtem Çiygoz.
Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
