Link açıqlığı

İşğal etilgen Aqmescitte «Sozidaniye» musulman medeniy merkezinde keçirilgen teşkerüv devamında uquq qoruyıcılar rusiyeli qanunlar boyunca yasaq etilgen edebiyatnı taptı, bunı bu yerge atıp qoydılar. Bu aqta Qırım.Aqiqatqa izaat bergen «Sozidaniye» assotsiatsiyasınıñ reisi Muslim Dervişev bildirdi.

«Biznen iç te bağlı olmağan bazı malümatlar tapıldı. Biz qattı aytamız ki, bunı yaramay niyeti olğan nasıldır cinayetçiler qoydılar. Rusiye Federatsiyası qanunına binaen, yasaqlanğan edebiyat cedveline kirgen eki ya da üç beyanname», – dep añlattı Muslim Dervişev.

Onıñ qayd etkenine köre, teşkilât ekstremizm ve radikalizmnen iç te bağlı degil.

«Teşkilâtımız, bizni bazı ğayrı hayırhaq adamlar qabaatlamağa tırışqan mefkürelerden uzaqtır. Biz açıqmız. Saqlaycaq bir şeyimiz yoq. Qırımda istiqrar ve yaratma yolumıznı devam etecekmiz», – dep qayd etti teşkilât yolbaşçısı.

Rusiyeli uquq qoruyıcı ve nezaret etüv organlarınıñ temsilcileri avgust 5-te, bazarertesi künü işğal etilgen Aqmescitte musulman medeniy merkezi olğan «Sozidaniye» assotsiatsiyasına teşkerüvnen keldi. Medeniy merkez yolbaşçısınıñ sözlerine binaen, teşkerüvniñ keçirilmesi kerekligini, bu yerde ekstremizmge qarşılıq qanunı bozulğanı aqqında malümat peyda olğanınen añlattılar.

Rusiyege boysunğan Qırım uquq qoruyıcı organlarınıñ saytlarında tintüv aqqında malümat yoq.

Qırım Rusiye tarafından işğal etilgen soñ yarımadada qırımtatarlarnıñ evlerinde, camilerde tintüvler çoqlaştı, adamlar diniy sebeplerden taqip etile, dep qayd eteler Meclis temsilcileri ve uquq qoruyıcılar. Amma yarımadanıñ rusiyeli akimiyeti ve Kreml bunı red ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG