Link açıqlığı

Yalta deputatları yerli uquqçığa qarşı onıñ ukrain noqta-i nazarı içün şikâyet arizasını yazdı – uquq qoruyıcılar


Moskvağa boysunğan Yalta şeer şurası deputatları gruppası Rusiye Federal havfsızlıq hızmetine yaltalı uquqçı Yuriy Formusnıñ faaliyetini teşkermek muracaatınen mektüp yazdı. Mütenasip muracaat ve Rusiye FSB-sınıñ Yalta idaresinden Formus adına celpname nushaları Qırım uquq qoruyıcı gruppasında derc etildi.

Qırım uquq qoruyıcı gruppasınıñ saytında paylaşılğan muracaatta qayd etile ki, sanki Yuriy Formus, Yalta şeer okrugı belediye müessisesiniñ yolbaşçısı Valeriy Kosarevni istifağa çıqarması boyunca teşebbüs bildirmek muracaatınen er yaltalı deputatnıñ adına ariza yolladı.

Bundan sebep, deputatlar, paylaşılğan muracaat nushasında bildirilgenine köre, rusiyeli FSB reisi Aleksandr Bastrıkinniñ diqqatını «Qırım ve Aqyarnıñ Rusiye Federatsiyasına qoşulmasına qarşı olğan ve Rusiye Federatsiyasınıñ qayd etilgen subyektleriniñ Ukraina devletiniñ terkibine kirmesiniñ tarafdarı olğan» Yuriy Formusnıñ ukrain noqta-i nazarına celp etti.

İşğal etilgen Qırımnıñ rusiyeli ükümeti bu malümatnı resmiy olaraq tasdıqlamadı. Rusiyeli FSB de bu vaziyetke izaat bermey.

Qırım.Aqiqat Yuriy Formustan izaat almağa tırışa.

Avgust ayında rusiyeli uquq qoruyıcılar Yaltada yaşağan Ukraina vatandaşı Larisa Kitayskayağa cinayet yapqanı aqqında şeklenüv ve çıqmama aqqında imzalavnı taqdim etti. Bundan evel Rusiyege boysunğan prokuratura haber etti ki, müessisede bildirilgenine binaen, «internette rusofob fikirlerini tarqatqan» Yalta sakinine qarşı cinaiy iş açıldı.

Bu areketler müessisede Rusiye Cinaiy kodeksiniñ 282 maddesiniñ 1-ci qısmında belgilengen (millet alâmetleri boyunca nefret ve duşmanlıq duyğularını halq ögünde doğuruv) cinayet alâmetleri boyunca baqıla.

Larisa Kitayskaya qabaatlavlarnı red ete ve o, siyasiy sebeplerden taqip etilgenini qayd ete.

Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG