Link açıqlığı

Çiygoz boyunca mahkemede şaat «Rus Birligi» mitinginiñ azırlanuvı aqqında añlattı


Aqmescit, 2014 senesi, fevral 26

Sentâbr 2-de, cuma künü işğal etilgen Qırımnıñ Kremlge boysunğan Yuqarı mahkemesiniñ Ahtem Çiygoz boyunca nevbetteki toplaşuvında tek eki zararlanğan kişi sorğuğa çekildi. Çiygoznıñ adliyecisi Nikolay Polozovnıñ Qırım.Aqiqatqa bildirgenine köre, şaatlardan biri tek 2014 senesi fevral 26 vaqialar yüz bergen vaqıtta Çiygoznı körmegenini degil de, amma «Rus Birligi» («Russkoye Yedinstvo») mitinginiñ nasıl etip teşkil etilgenini de bildirdi.

«Ekinci zararlanğan kişi (Yevgeniy Anohin – QA) müim malümat bildirdi ki, «Rus Birliginiñ» mitingi saat ekige planlaştırılğan edi, amma aynı «halq ordusı» azası olğan onıñ ağası oña telefon etip, ertece kelmek kerek olğanını bildirdi, çünki o yerde böyle adlandırılğan Ukraina tarafını tutqanlarnıñ mitingi teşkil etilgen, ve qarşı noqta-i nazarını bildirmek kerek edi», – dep bildirdi Polozov.

Bunen beraber, şaat, mahkemeden evel Ahtem Çiygoznı tanımağanını qayd etti.

Mahkemeniñ nevbetteki toplaşuvınıñ keçirilmesi sentâbr 6-ğa planlaştırılğan.

Qırımtatar Milliy Meclisi reisniñ muavini Ahtem Çiygoz Rusiye tarafından işğal etilgen Qırımda «fevral 26 işi» boyunca mahküm etile.

Ahtem Çiygoz 2015 senesi yanvar ayında 2014 senesi fevral 26-da Qırım Yuqarı Radasınıñ binası ögünde keçirilgen Ukraina topraq bütünligine qoltutuv mitinginde iştirak etkeni içün yaqalanğan edi. O vaqıt Rusiye tarafını tutqan, bu cümleden «Russkoye Yedinstvo» («Rus Birligi») firqası, miting iştirakçilerine qarşı çıqtı. İşğal olunğan Qırımnıñ Rusiye akimiyeti onı kütleviy çatışmalarnıñ teşkil etmesi ile qabaatlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG