Rusiyege boysunğan Qırım Yuqarı mahkemesi sentâbr 1-de, cumaaqşamı künü «fevral 26 işi» boyunca qabaatlanğan Qırımtatar Milliy Meclisi reisiniñ muavini Ahtem Çiygoznı mahkeme toplaşuvı zalına kirsetmege musaade etüv aqqında imayeciniñ şefaat arizasını kene de red etti. Bu aqta Çiygoznıñ adliyecisi Nikolay Polozov Twitterde bildirdi.
«Mahkemeciler Çiygoznıñ mahkeme zalına kirsetilmesi aqqında şefaat arizasını kene de red etti», – dep yazdı Çiygoznıñ imayecisi.
Avgust 18-de keçirilgen toplaşuvda da mahkemeciler Çiygoznıñ mahkeme zalına kirsetilmesi aqqında şefaat arizasını red etken edi.
İşğal etilgen Qırımnıñ Rusiyege boysunğan Yuqarı mahkemesi sentâbr 1-de «fevral 26 işi» çerçivesinde Qırımtatar Milliy Meclisi reisiniñ muavini Ahtem Çiygozğa qarşı işni baqmağa devam ete.
Umumen olaraq, qabaatlav boyunca şaatlarnıñ sayısı tahminen 80 kişini teşkil ete.
Bundan evel qabul etilgen sentâbr ayında keçirilecek nevbetteki toplaşuvlarnıñ cedveline binaen, merasimler aftada üç kere keçirilecek.
Ahtem Çiygoz 2014 senesi fevral 26-da Qırım Yuqarı Radası binası yanında Ukraina topraq bütünligine destek olaraq keçirilgen mitingde iştirak etkeni içün 2015 senesi yanvar ayında yaqalandı. İşğal etilgen Qırımnıñ rusiyeli ükümeti onı kütleviy nizamsızlıq yapqanında qabaatlay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
