Kiyevde işğal etilgen Qırımda rusiyeli FSB tarafından taqip etilgen mühbir Mıkola Semena aqqında malümatnı halqqa bildirmege ve oña qol tutmağa çağırdılar.
«Qırımda söz serbestligini, mühbir sözü serbestligi aqqını bozuvnıñ eñ parlaq timsali, Mıkola Semenağa qarşı cinaiy iş ola. Em Ukraina, em de Avropa, Rusiye mühbirler cemiyetine öz zenaatdaşına yardım etmege muracaat etemiz. O, zorbalıqqa çağırmadı. Taqiqatnıñ fikrince, o, Qırımnıñ Ukrainağa qaytarılması içün nasıldır bölünüvlerge çağırğan edi. Bunıñ cinayet olması mümkün degil», – dep ayttı mühbirniñ adliyecisi Aleksandr Popkov avgust 31-de Kiyevde keçirilgen matbuat konferentsiyasında.
«Mühbirler öz zenaatdaşına yardım etmege istese, jurnalistlerni, bunen beraber, Ukrainada cemaat teşkilâtlarını bizge Qırım zenaatdaşımızğa destek köstermek içün halqara ekspertlerni tapmaq yardım etmege çağıramız», – dedi o.
Radio Svobodanıñ Qırım.Aqiqat leyhasınıñ reberi Vladimir Pritula qayd etti ki, Mıkola Semena Qırımda öz zenaat vazifelerini eda etkeni sebebinden taqip etile.
«O, çoqtan Radio Svobodanen işbirlik tuta ve hususan bunıñ içün taqip etile. Mıkola Semena, belli ukrain mühbiri ola, onı Qırım mühbircilik ustası, dep sayalar. O, aman-aman 50 yıl çalışa, pek yaş olıp başlağan edi. O, bir çoq rayon neşirlerniñ yolbaşçısı edi. Soñki 10 yıl devamında o, Qırımda ögdeki ukrain gazetalarınıñ mühbiri edi – «Zerkalo nedeli», «Den», bundan da ğayrı, «Moskovskiye izvestiya» gazetasınıñ mühbiri edi. Hususan bunıñ içün em ukrain, em de rusiyeli mühbirlerniñ birdemligine işanamız. Halqara uquq qoruyıcı ve mühbirler teşkilâtlarınıñ destegini de bekleymiz», – dep ayttı Pritula.
Ukraina haber siyaseti naziriniñ birinci muavini Emine Ceppar qayd etti ki, Qırımda mustaqil mühbir olaraq çalışma şimdiki vaqıtta ayat ve sağlıq içün telükeli ola, Mıkola Semenanen olğan vaziyet ise, bunıñ delili ola.
Baarde Qırımda kütleviy şekilde tintüvler, bu cümleden, Qırım.Aqiqat ile işbirlik tutqanında şeklenilgen mustaqil mühbirlerde tintüvler keçirildi. Radio Svoboda müellifi Mıkola Semenağa qarşı Rusiye Federatsiyasınıñ topraq bütünligini bozmaq çağırğanında şeklenilüv boyunca cinaiy iş açıldı. Rusiyeli taqiqat oña yarımadadan çıqmağa yasaq etti.
Avgust 29-da, bazarertesi künü Aqmescitteki Kiyev rayon mahkemesi belli ukrain mühbiri Mıkola Semenanıñ adliyecisi bergen FSB taqiqatçısınıñ areketlerine qarşı şikâyetini red etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
