Link açıqlığı

Saatnıñ esas haberi

Polozov: Çiygoz boyunca mahkemede 4 zararlanğandan 3 kişi – 2014 senesi «kütleviy nizamsızlıqta» onıñ rolü aqqında haberdar degil


Ahtem Çiygoz
Ahtem Çiygoz

Avgust 30-da işğal etilgen Qırımnıñ Rusiyege boysunğan Yuqarı mahkemesiniñ «Çiygoznıñ işi» boyunca nevbetteki toplaşuvı yekünlendi.

Adliyeci Nikolay Polozovnıñ Qırım.Aqiqatqa bildirgen malümatına binaen, toplaşuvda «malümat az edi», 2014 senesi fevral 26-da yüz bergen vaqialar neticesinde dört zararlanğan kişiden üçü Ahtem Çiygoznı körmedi.

«Olardan iç biri, bir kişiden ğayrı, Çiygoznı körmedi, bir şey haber etip olamay. Kobozev soyadlı adam qayd ete ki, o Çiygoznı kördi, onıñ qırımtatar tilinde emirler bergenini, bundan soñ adam sürüsi basım yapqanını kördi, amma o bu emirlerniñ manasını bilmey, çünki tilni añlamay. Olardan episi nasıldır yara aldı, biriniñ başına taş urdı, digeri yıqıldı ve onı adamlar taptadı, amma ciddiy aqibetler olmadı, daa biri özüni yaramay duydı, amma bu qaytqanda elektrik trende oldı», – dep ayttı adliyeci.

Polozovnıñ fikrince, zararlanğanlar Ahtem Çiygoznıñ areketleri ve fevral 26-da yüz bergen vaqialar arasında doğru bağnı tasdıqlamadı, bunen beraber, mahkemede sorğuğa çekilgenler «Çiygoznıñ kütleviy nizamsızlıqlarnıñ teşkil etilmesinen, cinaiy plannıñ tizilmesinen nasıl etip bağlı olğanını aytıp olamadı».

Bundan da ğayrı, adliyeci «Qırım samooboronası» areketlerinde uquq temeli olmağanını qayd etti.

«Körüne edi ki, mahkemeciler «halq quvetleri», «samooborona» faaliyetiniñ uquqiy temeli, bu «samooboronağa» kim ve nasıl bir temeline esaslanıp emir bergeni meselelerini alıp çıqarmağa tırışa», – dep ayttı Polozov.

Sentâbr ayına nevbetteki toplaşuvlarnıñ cedveli qabul etildi – olar aftada üç kere keçirilecek, nevbetteki toplaşuv sentâbr 1-de, cumaaqşamı künü olacaq.

Ahtem Çiygoz 2014 senesi fevral 26-da Qırım Yuqarı Radası binası yanında Ukraina topraq bütünligine destek olaraq keçirilgen mitingde iştirak etkeni içün 2015 senesi yanvar ayında yaqalandı. İşğal etilgen Qırımnıñ rusiyeli ükümeti onı kütleviy nizamsızlıq yapqanında qabaatlay.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG