Qırımtatar Milliy Meclisi reisiniñ birinci muavini Nariman Celâl qırımtatar cemmat faallerini ve Qırımda siyasiy repressiyalardan zararlanğan er kesni insan aqları bütün bozuvları aqqında mümkün olğanı qadar halqqa bildirmege çağırdı. Bu aqta o Qırım.Aqiqatqa bergen izaatında bildirdi.
«İlk kün, İlmi Umerov (Meclis reisiniñ muavini – QA) psihiatrik hastahanege ketirilgen vaqıtta, biz birden er şeyni fotoresimge çıqara edik, o yerde nasıl şarait olğanını añlattıq, ve bir afta keçken soñ oña raat kire bilemiz, bir şeyler teslim etemiz. Olar böyle diqqattan qorqa, çünki bu müessisedeki vaziyetni açıqlaymız. Yani, bizden olarnı raat qaldırmaycağımız talap etile», – dep qayd etti o.
Avgust 27-de Nariman Celâl «Qırım birdemligi» birleşmesi iştirakçilerinen körüşüvde olarğa Qırımda bütün qanun ve insan aqları bozuvları aqqında halqqa bildirmege tevsiye etti.
«Keliñiz, bu aqta qıçırayıq, çünki şimdi buña tek halqara cemaatçıqnı degil de, hususan tıbbiy uquq qoruyıcı müessiselerini celp etmege isteymiz. Olarnıñ kirişmege imkânı olsun, dep. Böyle şaraitte adamlarnı tutmaq mümkün olmağanını, bu qıynav olğanını aytacaq diplomatlar, ekspertler, bu cümleden tıbbiy, Ukrainadan imkan olmasa, Moskvadan bu yerge kelsinler, dep tırışamız. Añlamaq kereksiñiz ki, biz bir qulaqqa qıçıramız, Rusiye Federatsiyası diger qulaqqa qıçıra. Bunıñ içün, sizde bar olğan er angi malümat halqqa, bu cümleden, içtimaiy ağlardaki saifeler vastasınen bildirilmek kerek», – dep ayttı Nariman Celâl.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
