Meraqlanğan er kimsege!
Rus apishanesinde üçünci yıl devamında oturam. Üçünci yıl devamında memleketime qarşı cenk alıp baralar. Duşman haince, alçaqça, sanki onıñ yapqan işi yoq kibi cenkleşe. Oña iç kimse ende inanmay, lâkin bu onı toqtatmay. Cenk dülber olmay, amma, er alda, aqiqat bizim tarafımızda – biz iç kimsege ucum etmedik, biz öz özümizni qorçalaymız.
Lâkin bu, er kesge bilingen, tıştaki, esas duşmanımızdan ğayrı başqaları da bar. Olar ufaqçadır, lâkin içimizdeler, teri tübünde, aman-aman özümüzinkiler. Amma olar biz içün degil, özleri içün turalar. Bazıları eski zamandan qaldı, bazıları sadece eskice yaşamağa istey, faqat yañı qıyafette. Olmaz. O büyüginde de, bu kiçiklerde de – maqsatları farqlı, lâkin biz olarnen bir yolda degilmiz. Ve men, baqarmız kim kimni yeñer, demeycem. Men öyle de bilem, kim yeñecek. Serbestlikke ve inkişafqa doğru aveslikni toqtatmaq mümkün degil.
Umumiy cedvelde adiy soyad olaraq qalmaq isteyim. Maña soñki çıqmağa teklif eteceklerinde şübelenem, amma bu yahşı olur edi
Rusiyeniñ esaretinde çoq adammız, daa ziyadesi – Donbassta. Kimini endi azat ettiler, qalğanları bekley ve ümüt ete. Er biriniñ öz ikâyesi ve keçindirme şaraitleri bar. Kimi esirler mevzusında özüne nam qazana, kimi kerçekten çalışa. Başqalardan ertece çıqmaq içün daa belli mabus olmaq – menim keçmege istegenim yol degildir. Yurğannı özüme tartmağa istemeyim. Umumiy cedvelde adiy soyad olaraq qalmaq isteyim. Maña soñki çıqmağa teklif eteceklerinde şübelenem, amma bu yahşı olur edi.
Bu yerde apiste biz çoq şeyden marum qalamız. Azatlıqtan marum degilmiz – bunı endi alamazlar, lâkin memleketke faydalı olmaq içün imkânlarımız pek az. Daa doğrusı, yapa bilecegimiz tek bir şey bar – ayaqta turmaq. Bizni er şeyden qıymetli körüp çıqarmağa kerekmey – bundan ğalebe yaqınlaşmaz. Bizni duşmanğa qarşı silâ kibi qullanmaq – ebet. Biliñiz ki, biz siziñ zayıf parçañız degilmiz. Zalımnıñ tabut qapağına urılacaq mıq olsaq, men öyle bir mıq olmağa ister edim. Sadece biliñiz, bu mıq qıyışmaz.
Oleg Sentsov, siyasiy mabus, terrorizmde qabbatlanıp Rusiyede apis etilgen qırımlı rejissör
«Fikir» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün
