Herson vilâyetiniñ mudafaa küçlerinen bağlı mesele 9 sentâbr künü Vilâyet şurasınıñ toplaşuvında baqılacaq. Bunı işğal etilgen Qırım ile sıñırdaş olğan Herson vilâyetiniñ devlet idare matbuat hızmeti bildire.
Müessisede, ayrıca, vilâyetniñ devlet idare yolbaşçısı Andriy Gordeyevniñ vilâyet şura reisi Andriy Putilovqa yazğan mektübine atıf eteler. Mektüpte Herson bölgesiniñ mudafaa masraflarına qoşma sermiyalarnıñ ayırılmasınen bağlı sualni muzakere etmek muracaatı mevcut.
«Vilâyetniñ devlet idaresine Hersondaki Ukraina telükesizlik hızmeti idaresi, Herson vilâyetinde yerleşken Ukraina arbiy quvvetler ve Devlet sıñır hızmetiniñ bölükleri tarafından, vilâyetniñ mudafaasını acele küçlendirmek muracalatına binaen, ve teşebbüsçilernen birlikte kerekli tedbirlerniñ munasip şekilde alınması ve maddiy teminlenmesi maqsadı ile», − degen sözlerni vilâyet idaresinde Gordeevniñ mektübinden açıqlaylar.
Soñki vaqıtta Moskva ve Kyiv arasındaki kerginlik beterleşti.
Avgust 10-da Rusiye Federal havfsızlıq hızmeti ilân etti ki, işğal etilgen Qırımda «yarımada infrastrukturası ve ayat teminlemesi içün pek müim obyektlerde» teraktlarnıñ ögüni kördi, Ukraina Mudafaa nazirligi Baş istihbarat idaresini bunı azırlağanında qabaatladı, «diversiya» teşkilâtçılarından biri yaqalanğanı aqqında bildirdi. Rusiye prezidenti Vladimir Putin, FSB beyanatını izaatlar eken, Kyivni muzakere yollarını qıdırmaq yerine teror usullarına keçkeninde qabaatladı.
Ukraina Arbiy quvvetlerniñ baş merkezinde FSB beyanatını inkâr ettiler ve onı provokatsiya kibi tanıdılar. Ukraina Devlet sıñır hızmeti Rusiyeniñ soñki künler devamında qıtaiy Ukraina ve işğal etilgen Qırım arasındaki memuriy sıñırğa yañı tehnika ile arbiylerni yaqınlaştığanı aqqında beyan etti, ve ukrainlilerni yarımadanı ziyaret etmemege çağırdı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
