Qırımda «Soçi-Aqyar» marşrutınen ketken «Bova» markalı avtobus yandı. Bu aqta avgust 16-da, salı künü Fevqulade vaziyetler nazirligi Qırım boyunca idaresiniñ matbuat hızmeti bildire.
Elde etilgen malümatqa köre, vaqia Qarasuvbazar rayonındaki Kökey (Rusakovka) köyüne buruluş yanında yüz berdi. Yanğın meydanı tahminen 8 kvadrat metrni teşkil etti.
«Avtobus yolcuları ve aydavcısı yanğın neticesinde zararlanmadı: olar naqliyeni terk etti. Umumen olaraq, avtobusta 41 kişi bar edi, olarnıñ arasında balalar yoq edi. Rusiye Fevqulade vaziyetler nazirliginiñ qurtarıcıları vatandaşlarnı havfsız mesafege alıp ketirdi ve yolcularnıñ aynı yolnen ketken naqliyenen yollanılmasını teşkil etti», – dep aytıla beyanatta.
İlk tahminlerge köre, yanğın avtobusnıñ motor bölüginde yüz berdi. Ekspertler sebeplerni ögrene, dep qayd ettiler müessisede.
Bu, Qırımda yolcu avtobusı ilk yanması degil. İyün 23-te Aluşta-Aqmescit yolunda Aqyardan Krasnodarğa ketken MAN turistik avtobusı yandı. Avtobusta 44 yolcu bar edi, olardan 37 kişi 8-10 sıñıf talebeleri edi. Olar zararlanmadı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
