İyün 23-te, cumaaqşamı künü Rusiye tarafından işğal etilgen Qırımda, Aluşta-Aqmescit yolunda Aqyardan Krasnodarğa ketken MAN turistik avtobusı yandı. Kremlge boysunan Qırım Fevqulade vaziyetler nazirliginiñ matbuat hızmetiniñ bildirgenine köre, vaqia Yuqarı Şuma (Verhnâya Kutuzovka) köyü yanında yüz berdi, avtobus yolcuları arasında zararlanğanlar yoq.
Müessisede qayd etkenlerine köre, avtobusta 44 yolcu bar edi, olarnıñ arasında 37 bala bar edi. Qırım kütleviy haber vastalarınıñ bildirgenine binaen, olar 8-10 sınıf talebeleri ola.
«Yanğın saat 18.35 söndürildi. Yanğın meydanı 30 kvadrat metrni teşkil etti», – dep aytıla beyanatta.
Qırım Fevqulade vaziyetler nazirligi matbuat hızmetiniñ yolbaşçısı Vladimir İvanovnıñ «Krıminform» Qırım saytına bildirgen malümatına köre, yolcular tuman qoqusını duydı ve vaqtında avtobusnı terk etti.
Onıñ qayd etkenine köre, avtobus yaqarlıqnen beraber bütünley yandı.
Yanğın kerçek sebebini ekspertiza belgileycek, dep bildirdiler müessisede.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
