Link açıqlığı

FSB psihekspertiza keçirmek içün Umerovnıñ hastahaneden çıqarılmasını talap ete – Çubarov


İlmi Umerov

Qırımtatar Milliy Meclisinde Rusiye Federal havfsızlıq hızmeti Meclis reisiniñ muavini İlmi Umerov tedaviylenüvden keçken Aqmescitteki hastahane ekimlerini sıqıştırğanı aqqında malümatnı teşkereler.

Meclis reisi Refat Çubarovnıñ avgust 16-da Kiyevde keçirilgen matbuat konferentsiyasında añlatqanına köre, rusiyeli uquq qoruyıcılar Umerovğa qarşı açılğan «separatizm aqqında» iş çerçivesinde oña qarşı psihiatrik ekspertizanıñ keçirilmesi boyunca mahkeme qararını ömürge keçirmek niyetindeler.

«Tünevin o yerde (hastahanede – QA) FSB temsilcileri oldı, olar, mahkeme qararını işke tüşürmek içün, ekimlerden onı hastahaneden çıqarmasını talap etken ediler. Onı mecburiy şekilde psihiatrik hastahanege yollamaq içün de mahkeme qararı bar. Adliyeciler şikâyet etkenlerine ve bu qarar işke tüşürilip olamağanına baqmadan da», – dep añlattı Çubarov.

Çubarovnıñ bu beyanatı boyunca rusiyeli uquq qoruyıcı organlarınıñ izaatı yoq.

İlmi Umerovnıñ rusiyeli adliyecisi Mark Feygin matbuat konferentsiyası devamında qayd etti ki, onıñ imaye etken kişi, mahküm etilgen olsa da, sağlıq alı sabebinden cezasını toldurıp olamaz.

«Aqiqiy ceza müddeti oña berilmez. Onıñ sağlığı buña mania ola. Çünki bu iş simvoliktir, bu iş teşviqiydir. Qırımtatarlar özüni nasıl alıp barsın dep, köstermek kerek», – dep ayttı adliyeci.

Qırımda uquq qoruyıcılar İlmi Umerovğa qarşı Rusiye Cinaiy kodeksiniñ 280.1 maddesi (separatizm) boyunca cinaiy iş açtı.

İlmi Umerovnıñ alı avgust 11-de Qırımda oña qarşı psihiatrik ekspertizanıñ belgilenmesi boyunca mahkemede yaramay oldı. Acele yardım kelip, kardiografik tedqiq yapqan soñ, Umerovnı Aqmescit hastahanesine infarkt havfı ile alıp kettiler. Bundan soñ Rusiyege boysunğan Aqmescitteki Kiyev rayon mahkemesi Umerovnıñ statsionar mahkeme-psihiatrik ekspertizadan keçmesi kerek olğanı aqqında qarar aldı.

İmayeciler bu mahkeme qararına qarşı şikâyet etti.

«Memorial» rusiyeli uquq qoruyıcı merkezinde Qırımtatar Milliy Meclisi reisiniñ muavini İlmi Umerovğa qarşı işğal etilgen Qırımda cinaiy taqipni qanunsız ve siyasiy sebeplerden olğanını ayttılar, çünki o, zorbalıq areketlerine çağırmay edi.

XS
SM
MD
LG