Qırımda İnsan aqları saqlavı boyunca halqara komitet eñ yaqın vaqıtta taqdim etilecek. Bu aqta Qırımtatar Milliy Meclisi reisi Refat Çubarov avgust 16-da Kiyevde keçirilgen matbuat konferentsiyasında ilân etti, dep bildire Qırım.Aqiqat mühbiri.
«Şimdiki vaqıtta adliyecilernen laf etemiz... diger cemaat erbaplarınen Qırımda insan aqları saasında olğan esnaslarnı öz faaliyetinde birleştirgen Halqara komitetniñ teşkil etilmesi imkânını laf etemiz. Siyasetçiler, halqara uquq qoruyıcı teşkilâtlarnıñ destegini, Qırımda insan aqları teminlenmesi boyunca qararlarnıñ, o yerde yaşağan adamlarnıñ yaşama havfsızlığı meseleleri çezilmesiniñ destegini tapa bilecek Halqara uquq qoruyıcı komiteti. Eñ yaqın vaqıtta bu komitetniñ teşkil etilmesi şartlarını taqdim ete bilecekmiz», – dedi o.
Çubarovnıñ sözlerine köre, bu komitetniñ iş adı «Qırım» ola ve öz faaliyetinde o, eñ evelâ, «Qırımtatar Milliy Meclisiniñ imkânları ve tecribesine» esaslanacaq. Bundan da ğayrı, komitette iştirak etmek içün itibarlı ekspertler, cemaat teşkilâtları temsilcileri, yani eki yıl devamında Qırım yarımadasında insan aqları teminlenmesi meslelerinen oğraşqan kişiler davet etilecek.
Çubarovnıñ sözlerine köre, Komitetniñ esas vazifelerinden biri, yarımadada ukrain vatandaşlarına qarşı alıp barılğan mahkeme esnaslarında iştirak etmek ve olarnıñ menfaatlarını qorçalamaq maqsadınen adliyecilerniñ Qırımğa ziyaretleri mehanizminiñ işlep çıqarılması olacaqtır.
Qırım Rusiye tarafından işğal etilgen soñ yarımadada Ukraina tarafdarları ve qırımtatar faalleri taqip etilip başladı. Bu aqta uquq qoruyıcılar çoq bildirgen edi. Olar Kremlni insan aqları bozuluvını toqtatmağa çağırğan edi. Amma Moskvada ve rusiyeli Qırım ükümeti repressiyalar aqqında malümatnı red ete.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
