Link açıqlığı

«Krım SOS»: Qırımdan ketken aqay kişilernen rusiyeli uquq qoruyıcılar subetleşe


İllüstratsiya fotoresimi

Rusiye uquq qoruyıcı organları işğal etilgen Qırımda Ukraina qıtaiy qısmına ketken aqay kişilernen subetler keçire. Aqaylar memuriy sıñırdan keçkende, rusiyeli taraf vesiqalarnı çoq vaqıt devamında teşkere. Bu aqta malümat «Krım SOS» cemaat teşkilâtınıñ Facebook saifesinde bildirile.

«Qırımdan çıqışta kiçik nevbetler bar, bu, rusiyeli uquq qoruyıcı organları aqay kişilerniñ vesiqalarını çoq vaqıt devamında teşkergeni ve subetleşkeninen bağlıdır. Nevbetlerniñ olmaması, eñ evelâ, memuriy sıñırdan (Kalançak ve Çaplınka keçirüv noqtalarından) keçken adamlarnıñ sayısı eksilgeninen bağlı», – dep aytıla beyanatta.

Teşkilâtnıñ malümatına köre, Ukraina qıtaiy qısmından Qırımğa kirişte nevbetler yoq. Bütün keçirüv noqtalar ştat rejiminde çalışa.

Amma memuriy sıñırda ara-sıra rusiyeli uçucı olmağan uçaqlar uça, bunen beraber rusiyeli mevziler tarafından projektorlar çalışa.

Yolcu-naqliye aqımınıñ ve memuriy sıñır yanında rusiyeli askerler faaliyetiniñ eksilmesini avgust 15-te Ukraina Devlet sıñır hızmetinde qayd etkenler.

2014 senesi Qırım Rusiye tarafından işğal etilgen soñ qıtaiy Ukraina ve yarımada arasında resmiy şekilde – memuriy, amelde ise – aqiqiy bir sınır peyda oldı. Memuriy sıñırda üç kiriş-çıqış noqtası çalışmaqta – «Kalançak», «Çonğar» ve «Çaplınka».

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG