Qırımtatar Milliy Meclisi reisiniñ birinci muavini Nariman Celâl avgust 12-de Bağçasarayda Refat Mazalovnıñ yaqalanması diniy ya da siyasiy meselelernen bağlı degil. Onıñ qayd etkenine köre, erkekniñ bulunğan yeri belli degil.
Bunı Celâl Qırım.Aqiqatqa bildirdi.
«Refatnıñ qorantası siyasetnen meraqlanmay. O, bir de bir siyasiy ya da diniy teşkilâtnen bağlı degil. Onıñ evinde keçirilgen tintüv ve soñra yaqalanması bunıñnen bağlı olğanını aytmaq mümkün degil», – dep ayttı Meclis reisiniñ birinci muavini.
«Refatnıñ aytqanına köre, uquq qoruyıcılar tintüv ne maqsat ile keçirilgenini ve onı ne sebepten yaqalağanlarını aytmadılar. Erkekniñ şimdiki bulunğan yeri belli degil. Bizler onıñ Bağçasaray politsiyasınıñ bölüginde olıp-olmağanını ya da Federal havfsızlıq hızmetinde, ya da ekstremizm ile küreş merkezinde bulunğanını teşkeremiz», – dep qoştı Celâl.
Avgust 12-de qırımtatarı Refat Mazalovnıñ evinde Rusiye uquq qoruyıcıları tintüv keçirdi, soñra OMON hadimlerinen beraber onı alıp kettiler. «Krımski politv'yazni» birleşmesiniñ malümatına köre, er kişi Bağçasaray politsiyasınıñ bölügine alıp ketirildi. Rusiye uquq qoruyıcıları tintüv vaqtında çıqarılğan video silinmesini talap etti.
Bundan evel qırımlı Mümine Saliyeva Refat Mazalovnıñ evinde keçirilgen tintüv aqqında haber etti.
Rusiye kontrol etken Qırım uquq qoruyıcılarınıñ resmiy izaatları yoq.
Ukraina ve onıñ tışındaki uquq qorçalayıcı, devlet ve siyaset erbapları işğal etilgen Qırımda repressiyalar quvetlene bile, dep bildireler. Bunı em «Yarovayanıñ qanunları», em de Rusiye Federal havfsızlıq hızmetiniñ avgust 10-da Ukraina yarımadada «terakt» yapacaq edi kibi beyanatlarınen bağlaylar.
Rusiye Qırımnı işğal etken soñ yarımadada qırımtatarlarnıñ evlerinde sıq-sıq tintüvler keçirile, insanlarnı apiske atalar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
