Rusiye kontrol etken Qırım Yuqarı mahkemesi cuma künü, avgust 12-de, Qırımtatar Milliy Meclisiniñ reis muavini Ahtem Çiygoznıñ «fevral 26 işini» baqmağa devam ete. Adliyecisi Nikolay Polozovnıñ Twitterde yazğanına köre, saat 10:00 başlanacaq toplaşuv yarım saat keç qaldı.
Toplaşuv videokonferentsiya şeklinde keçirilmekte.
«Ahtem Çiygoz işiniñ mahkemesi yarım saat keç qaldı. Çiygoz yaramay bağ olğanından şikâyetçi. Sözlerniñ yarısı eşitilmey», – dep yazdı adliyecisi.
Onıñ bildirgenine köre, toplaşuvda Çiygoz mahkeme salonında iştirak etmek niyetini ve esnasqa adliyecisi Emil Kürbedinovnıñ kirsetilmesini rica etti. Avgust 9-da mahkeme esnasta Emil Kürbedinovnıñ iştirak etmesini red etti. Keçken toplaşuvda mahkemeciler prokuror Dombrovskiyniñ çekilmesine razı olmayıp, «halq haciziniñ inspektorı» olaraq tanıtılğan zarar körgenlerden birini sorğuğa çekti.
Avgust 2-de Aqmescitte Rusiyege boysunğan Qırım Yuqarı mahkemesi Ahtem Çiygozğa qarşı «fevral 26 işini» baqmağa başladı. Mahkeme qararına binaen, toplaşuv video konferentsiyası rejiminde keçirildi. Mahkeme Çiygoznıñ adliyecisiniñ video bağ rejimi boyunca şikâyet arizasını qabul etmege red etti, endi imayeciler kassatsiyanı azırlay.
Ahtem Çiygoz mahkemede özüni qabaatlı tanımadı, dep bildirdi adliyecisi Nikolay Polozov.
İyül 20-de mahkeme qapalı toplaşuvda «fevral 26 işini» ekige böldi: ayrı – Ahtem Çiygoz boyunca, ve ayrı – cinaiy iş boyunca qabaatlanğan Ali Asanov ve Mustafa Degermenci boyunca.
Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksönov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
