Ukraina Mudafaa nazirligi Baş istihbarat idaresiniñ müdiri general-leytenant Valeriy Kondratük bildirdi ki, Qırımda rusiyeli askerler ve sıñırcılar arasında atışma yüz berdi.
Bu aqta Kondratük avgust 11-de, cumaaqşamı künü Ukraina prezidenti Petro Poroşenko devlet uquq qoruyıcı müessiseleri ve Tışqı işler nazirligi yolbaşçılarınen «Rusiyeniñ işğal etilgen Qırımda provokatsiya areketleri ve onıñ Donbassta areketleriniñ eskalatsiyası munasebetinen» keçirgen toplaşuvda bildirdi.
«Rusiye Silâlı quvetleriniñ arbiy hadimleri ve Rusiye Federal havfsızlıq hızmetiniñ sıñır hızmeti arasında silâ qullanılğan atışma davası yüz berdi», – dep bildire Kondratükniñ sözlerini Poroşenkonıñ matbuat hızmeti.
Vaqia ne vaqıt yüz bergeni aqqında malümat bildirilmey.
Avgust 11-de ukrain prezidenti Ukraina Silâlı quvetler, Milliy Gvardiya, Ukraina Havfsızlıq hızmeti bölüklerini qaviyleştirilgen arbiy azırlıq alına ketirmege emir etti.
Rusiye Federal havfsızlıq hızmeti avgust 10-da bildirdi ki, işğal etilgen Qırımda «Ukraina Mudafaa nazirliginiñ Baş istihbarat idaresi tarafından azırlanılğan» bir sıra terroristik eylemlerniñ yapılmasına yol berilmedi, «onıñ esas obyektleri olaraq yarımadanıñ pek müim infrastruktura ve ayat teminleme elementleri belgilendi».
Ukraina Silâlı quvetler Baş ştabında rusiyeli FSB-nıñ beyanatını red eteler.
Qırım yarımadası ile memuriy sıñırda kritik vaziyet avgust 7-de saba başlandı, o vaqıttan berli rusiyeli taraf üç keçirüv noqtasında bir qaç sefer keçirüv rejimini deñiştire edi, de olarnı blok etip, de açıp. Evel olğanı kibi, rusiyeli taraf bunıñ sebebini añlatmay.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
