Ukraina Mudafaa nazirliginiñ İstihbarat baş idaresiniñ malümatına binaen, Rusiye tarafından işğal etilgen Qırım toprağında özek silâ yoq, amma onıñ bu yerge ketirmek içün vastalar bar. Yarımadada bulunğan Rusiye ordusı taqımı onı (özek silânı – QA) qullana bile. Böyle fikirni Qırım.Aqiqat Radiosınıñ saba yayınında Ukraina Mudafaa nazirliginiñ İstihbarat baş idaresiniñ temsilcisi Vadim Skibitskiy bildirdi.
«Özek silânı ketirmek içün vastalar şimdiki vaqıtta Qırım territoriyasında, hususan, aviatsiya uçaq alanlarında ve Aqyar arbiy deñiz bazasında buluna. Bu, arbiy gemiler ve qayıqlardır. Özek silâ ise, Rusiye Federatsiyasınıñ Cenübiy arbiy okrugında yerleşe», – dep ayttı idare temsilcisi.
Vadim Skibitskiyniñ fikrince, kerek olğanda özek silâ yarımadağa ketirilecek ve qullanılmasına azır olacaqtır. «Olar ya keçirme vastalarınıñ donatması içün Qırım toprağına ketirile bile, böyle qarar alınsa. Ya da bu özek silâ, meselâ, uçaqlarğa, olar Cenübiy arbiy okrugına keçirilgen vaqıtta, qoyula bile. Bundan soñ bu vastalar arbiy qullanuvına azır olacaq», – dep qayd etti ekspert.
Bundan evel Skibitskiy ilân etken edi ki, Rusiye Federatsiyası Qırımda arbiy taqımlarınıñ çoqlaşması boyunca bir-biri artından kelgen areketler yapa.
Rusiyeli taraf ukrain askerleriniñ böyle beyanatlarına izaat daa bermedi.
Rusiye Federatsiyası mudafaa naziri Sergey Şoygu iyül 27-de Moskvada keçirilgen kollegiya toplaşuvında esabat berdi ki, işğal etilgen Qırım territoriyasında rusiyeli ordunıñ yeterli derecedeki taqımı bar. Onıñ fikrince, esasen bu «NATO-nıñ Şarqiy Avropada arbiy bulunmasınıñ ziyadeleşkeni, Ukrainadaki vaziyetnen» bağlıdır.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
