Link açıqlığı

Saatnıñ esas haberi

Bazar künü Qırım ile memuriy sıñırda kollaps yüzlerce adamlarnı şaşırdı – şaatlar


Avgust 7-de kün devamında işğal etilgen Qırım ile memuriy sıñırda bulunğan yüzlerce adamlar qorqqan ve şaşırğan. Bu aqta bazar künü Qırımnıñ «qapatılmasını» başından keçirgen içtimaiy ağlar qullanıcıları yaza.

«Bugün yüzlerce adamlar «Çonğarda» şokta edi. Keçirüv noqtasında ilân ettiler ki, Qırım, gece yüz bergen vaqia sebebinden, sıñırlarını bir qaç künge qapata. Rusiye gümrügi saba saat beşten çalışmadı. Amma yerli taksi aydavcıları, bunı bilip da, adamlarğa haber etmeyip, olarnı keçirüv noqtalarına alıp kete edi», – dep yaza memuriy sıñırdan keçken kişilerden biri.

Adamlar küneşte sekiz saat ve ziyade turğan edi. Ne yarımadağa kirmek, ne de artqa qaytmaq imkân yoq edi, çünki Novoalekseyevkadan, insanlarnıñ bildirgenlerine köre, biletler yoq edi.

Avgust 7-de saba Rusiye kütleviy haber vastaları, resmiy malümat olmadan, Qırım ile memuriy sıñırda sanki yüz bergen atışma aqqında bildirmege başladı. Bunen beraber, Rusiye kütleviy haber vastaları, memuriy sıñırda keçüvni ukrain tarafı qapatqan, dep qayd etti.

Qırımtatar Milliy Meclisi reisiniñ birinci muavini Nariman Celâl avgust 7-de Qırımnıñ şimalinde büyük rusiyeli asker taqımları aqqında bildirdi. Onıñ malümatına binaen, Canköy bütünley rusiyeli askerlernen sarımğa alındı.

Arbiy tehnikanıñ çoqşalması Keriçte de köründi.

Yarımada sakinleri Qırım.Aqiqatqa Qırımnıñ bazı regionlarında blokpostlarnıñ qoyulması aqqında ayttı.

Rusiyege boysunğan Qırım ükümetiniñ yarımadadaki bu vaziyet aqqında añlatması ve izaatı yoq.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG