Link açıqlığı

Mahsus Qırım.Aqiqat içün

Sıcaq yaz vaqtında insanlar tüşünmege degil, daa çoq raatlanmağa seve, Rusiye akimiyeti bunı qullanıp, Qırımda yañı qulluqnı kirsetti, yarımada sakinleriniñ çoqusı bunı sentâbr ayında ögrenecek. Bu vaziyette biznesniñ ölümi ve trolleybus aydavcılarınıñ isyanı ğayet normal bir şey.

1-inci yer. Avgust 1-den itibaren Qırım sakinleri mesken evleriniñ tolu tamir etilmesi içün para ödeycekler. Daireniñ er metre kâresi içün 6 ruble 16 kapik alınacaq. Qırımlılar paranı şimdi töleycek, amma tamir işleri uzaq kelecekte başlaycaqtır.

Rusiye akimiyeti yañı qulluq şeklini çıqardı – eali devletten alğan hızmet içün degil, evde oturğanı içün para ödey

Qomşu Rusiyede bu mesele Anayasa mahkemesine qadar ketti, amma mahkeme akimiyet tarafını tuttı. Rusiyeliler küle, tamir işlerinden soñ «evler altın ve elmazlarnen qapatılacaq, kirişlerinde fars kilimleri, avizelerde Svarovski taşları olacaq, em de areket sensörleri ve sensör anahtarları qoyulacaq».

Asılında, Rusiye akimiyeti yañı qulluq şeklini çıqardı – eali devletten alğan hızmet içün degil, evde oturğanı içün para ödey. Bu paralar evlerniñ tamir etilmesine sarf etilecegini tüşünmeysiñiz, doğrumı?

2-nci yer. Avgust 4-de Aqmescitte yalıñız 9 trolleybus şeer marşrutlarına çıqtı. Aydavcılar naqliye vastalarınıñ tehnik vaziyeti fena olğanından para cezaları alğanından şikâyet ete. Buña cevap olaraq «Krımtrolleybusnıñ» baş müdiri Aleksandr Şveykus şeerniñ Rusiye prokurorınıñ muavini yanında aydavcılarnı tenbiyeledi. Soñra Sergey Aksenov Aleksandr Şveykusnı işten boşatmaq qararını aydınlattı.

İnqilâp vaziyeti olacaq, ğaliba.

3-ünci yer. Rusiye prezidentiniñ iş adamlarınıñ aq-uquqlarını qorçalağan vekâletlisi Boris Titov Qırımda iş adamları içün «tam ve açıq» bir qaide körmedi, amma «kontrol-nezaret faaliyeti meseleleriniñ qıyınlıqlar» ve «qıyın naqliye-logistik vaziyetini» qayd etti. Bunı Sergey Aksenov ile açıq körüşüvinde ayttı. «Ğalipler taqımı» yarımadada biznes işleriniñ pek meraqlı usullarını qullana.

4-ünci yer. Qırımda yañı «naqliyat naziri» Anatoliy Volkov peyda oldı ve bir sıra yañı memur tayinlendi. «Naqliyat nazirligi» yol qurucılığı işlerini idare etse, birisi Dmitriy Medvedevniñ «Tavrida» yoluna tapqan 100 million rubleni elde etmek vazifesinen oğraşacaq. Yerli «Krımpil» keder etmez edi.

5-inci yer. Tasil saasında güzel bir haber. Kreml teşviqatı, Rusiyeniñ merkeziy aliy oquv yurtlarında yaratılğan şaraitler ve Perekoptaki logistik vaziyetine baqmadan, aman-aman 100 genç esas Ukrainada universitetke oqumağa kirdi. Yolğa devam – ilim menimsemeli!

6-ncı yer. Dünya Qırımtatar Kongressi İcra komitetiniñ avgust 1-de aydınlatılğan netice beyannamesinde Qırımda Rusiye rejiminiñ qurbanı olğan ukrain ve qırımtatarlarnıñ cedveli mevcut. Yarımada işğaliniñ eki yılı içinde Rusiye akimiyetine qarşı çıqqan 9 kişi öldürildi. 15 insan qaçırıldı ve 25 kişi siyasiy mabus olaraq apiske atıldı.

Bu terrorist areketlerinden Rusiye rejimi mesüliyetli

«Bu terrorist areketlerinden Rusiye rejimi ve bunı amelge keçirgen insanlar mesüliyetli», – dep qayd etile beyannamede.

Bunıñ kibi vesiqalar Qırımnıñ şimdiki «akimiyetini» Gaagağa yaqınlaştıra.

7-nci yer. Qırımda «duşman seslerine» dayanamayıp, bir sıra haber resursını, şu cümleden Qırım.Aqiqat saytını blok ettiler. Roskomnadzor saytı saytnıñ blok etilmesine dair bir şey yazmay. Qırımnıñ Rusiye haber naziri Dmitriy Polonskiy sayt ne sebepten blok etilgenini bilmey. «Prokuror» Natalya Poklonskaya ise bu areketler prokuratura hadimlerine ait olğanını aydınlattı. Akimiyet bunı daa mayıs ayında yapqan edi, amma em o sefer, em de şimdi faydası olmadı.

​Ve soñunda. Çelâbinsk sakini Vâçeslav Abdullin Keriç köprüsiniñ qurucılığından 600 km cayav ketip ve yol otunı aşap evge keldi, çünki «Rusiyeniñ baş qurucılığında» oña bir aylıq iş içün 1500 ruble (tahminen 500 grivna) berildi. Bu haberni izaatlamağa kerek yoq.

​Er keske – eyi aftalar!

Andrey Vvedenskiy, Qırım közeticisi

«Fikir» rubrikasında bildirilgen fikir-tüşünceler müelliflerine ait olıp, muarririyetniñ baqışları ile aynı olmaması mümkün

XS
SM
MD
LG