Link açıqlığı

ATR telekanalınıñ baş müdiriniñ muavini Ayder Mujdabayev Rusiye tarafından işğal etilgen Qırımda ATR qırımtatar telekanalınıñ saytına kiriş qısmen blok etilgeni aqqında bildire. Bu aqta Mujdabayev Qırım.Aqiqatqa bergen izaatında qayd etti.

«ATR saytı blok etilgeni aqqında biz, er kes kibi, saba bildik. Şimdilik tolu malümatımız yoq. Ğaliba, birden er yerde o blok etilmez, amma olar bunı başlağan olsalar, soñuna qadar yapacaqtırlar. Meraqlısı şu ki, bazı provayderler bizni blok etmege unuta ve Moskvadan bazı insanlar bile bizni seyir ete», – dedi Mujdabayev.

Onıñ sözlerine köre, saytnıñ blok etilmesi telekanalnıñ mustaqil noqta-i nazarınen bağlıdır.

«Çünki biz qırımtatar mustaqil televizionı olamız – ve oldı. Olar, 2015 senesi bizni quvğanları kibi, bizden nefretlengenleri içün, biz mustaqil kütleviy haber vastası olğanımız içün, olar istemegen qırımtatar halqınıñ noqta-i nazarını aytqanımız içün bizni blok eteler», – dep ayttı ATR telekanalınıñ baş müdiriniñ muavini.

Rusiyeli ükümetten «АTR» saytınıñ blok etilmesi aqqında resmiy vesiqalarnı almağan edi, dep qayd etti Mujdabayev.

Avgust 1-de Radio Svoboda leyhası olğan Qırım.Aqiqat saytı Rusiye tarafından işğal etilgen Qırımda qısmen blok etilmesi aqqında belli oldı. Bir sıra provayderler saytqa kirişni blok etti. Aynı vaqıtta, Kefe ve Aqyarda qullanıcılar internet-resursını köre bile edi.

Qırımnıñ rusiyeli malümat naziri Dmitriy Polonskiy Qırım.Aqiqatqa bildirdi ki, saytqa kiriş blok etilmesi aqqında onıñ haberi yoq.

Avgust 2-de Qırım.Aqiqat saytına kiriş qısmen Aqyarda blok etilgeni aqqında belli oldı.

«Sobıtiya Krıma» portalınıñ muarririyeti olarnıñ saytına avgust kiriş 1-de aqşam yarımadada sıñırlanğanı aqqında bildirdi.

OSCE-de, Qırım.Aqiqat saytınıñ blok etilmesi boyunca izaat berip, qullanıcılarnıñ İnternette malümat alma ve paylaşma aqqı haber saytlarına kirişni blok etüv vastasınen bozuluvından qasevet çekkenlerini bildirdiler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG