Kremlge boysunğan Qırım kurort ve turizm naziri Sergey Strelbitskiy ilân etti ki, Qırım Türkiyeden turistlerni qabul etmege azır. Bu aqta Qırım nazirliginiñ matbuat hızmeti bildire.
Strelbitskiy, Qırım ve Türkiye arasındaki ava yollarınıñ yañıdan açılmasına, ve yarımada «türkiyeli vatandaşlarnı qabul etip olacağına» ümüt besledi.
«O vaqıt çoq turistlerniñ Türkiyeden yarımadağa, onıñ dülberligini körmek, tedaviylenmek ya da sağlığını tüzetmek içün, kelmege imkânları peyda olacaq», – dep qayd etti Sergey Strelbitskiy.
Türkiye prezidenti Recep Tayyip Erdoğan kelecek ay Rusiyege zenaatdaşı Vladimir Putin ile körüşmek içün baracaq, dep bildire türkiyeli baş nazir muavini Mehmet Şimşek.
Kremlniñ qayd etkenine köre, bu, Erdoğan 2015 senesi noyabr ayında elâk olğan uçucınıñ qorantasından afu sorağanı ve taziye bildirgeninden soñ mümkün oldı. O vaqıt Türkiye arbiy ava quvetleri Türkiye ve Süriye arasındaki sıñır yanında rusiyeli Su-24 cenk uçağını urdı. O vaqıt Moskva Ankarağa qarşı sanktsiyalar kirsetti.
Bundan evel bu ayda Putin Erdoğanğa telefon açıp, Türkiyede avdarma ıntıluvı munasebetinen destek köstergenini bildirdi. Kremlde qayd ettiler ki, eki lider yaqında körüşecek.
