Link açıqlığı

Qırımda insanlarnı qaçıruv ve öldürüv – rusiyeli nizamnıñ terroristik areketleridir – BDQK icra komitetiniñ beyannamesi


Avgust 1-de derc etilgen netice beyannamesinde Bütün Dünya Qırımtatar Kongressiniñ icra komiteti işğal etilgen Qırımda rusiyeli nizamnıñ qurbanları olğan ukrainler ve qırımtatarlarnıñ cedvelini taqdim etti. Yarımadanıñ eki yıllıq işğali devamında Rusiye ükümetine qarşı olğanlardan 9 insan öldürildi. Daa 15 kişi qaçırıldı ve 25 adam siyasiy mabus olaraq yaqalandı, dep aytıla BDQK beyannamesinde. Vesiqa Qırımtatar resurs merkeziniñ Facebook saifesinde derc etilgen.

Qayd etilgenine köre, «bu qırımtatarlar ve ukrainler Qırımnıñ rusiyeli ahlâqsız işğaline qarşılıqnıñ timsali oldı. Qırımtatar halqı bu adlarnı daima hatırlaycaq».

BDQK delegatları qayd etilgen adamlarnıñ yoq etilmesi, qaçırılması ve yaqalanmasını terroristik areketler, dep adlandırdı.

«Bu terroristik areketler içün rusieyli nizam ve onı yapqanlar mesüliyetlidir. Bütün Dünya Qırımtatar Kongressi, bu terroristik areketler içün mesüliyetlilerge qarşı cinaiy ve vatandaş sanktsiyalarınıñ bütün çeşitleri ömürge keçirilmesi içün mahkeme esnaslarına kerekli qarışuv yapacaq», – dep qayd etile vesiqada.

Bundan evel BDQK icra komitetiniñ toplaşuvında Ukraina prezidentiniñ qırımtatar halqı meseleleri boyunca vekâletlisi Mustafa Cemilev işğal etilgen Qırımda qaçırılğan ve belgisiz ğayıp olğanlarnı hatırladı. Hususan, Cemilev BDQK icra komitetiniñ azası Ervin İbragimovnıñ qaderini hatırlattı.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

BDQK icra komiteti toplaşuvlarnı 2,5 ayda bir kere qırımtatar diasporası büyük olğan devletlerniñ birinde keçirile. Evelki toplaşuv Vilnüste keçirildi. Noyabr ayında toplaşuvnıñ Poloniyada, Varşavada keçirilmesi planlaştırıla.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG