Link açıqlığı

Kreml tarafından tayinlengen Qırım prokurorı Natalya Poklonskaya qayd ete ki, yarımadada hırsızlanğan Ervin İbragimovnı, onıñ ğayıp olmasından bir ay keçken soñ, sağ olğanını körgen ediler.

Bu aqta Poklonskaya işğal etilgen Qırımğa tünevin kelgen frenk parlamentariylernen körüşüvde ayttı, dep bildire Qırım ükümetiniñ «ruporı» olğan «Krıminform» saytı.

«Taqiqat-operativ yolunen qayd etildi ki, onıñ ğayıp olmasından bir ay keçken soñ, onı yarımada territoriyasında sağ-selâmet körgen ediler. Bunen beraber, onıñ ğayıp olması video kamerağa yazılğan, qaysı biri uquq qoruyıcı organları onı uquq qoruyıcılarnıñ avtomobiline tıqqanını qayd etti», – dep ayttı Poklonskaya.

Onıñ qayd etkenine köre, yüz bergen vaqia «cumhuriyet uquq qoruyıcı organlarına qarşı tecavuz ve negativ peyda etmek içün yapılğan provokatsiya» ola bile. Ve ayttı ki, «Qırımda adamlarnıñ sanki hırsızlanması yarımadada insan aqları bozulması mevzusı boyunca şamata kötermek içün yapılğan».

Ervin İbragimovnıñ hırsızlanması aqqında 2016 senesi mayıs 24-te haber peyda oldı. Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başlağanını bildirgen edi.

Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.

Rusiyege boysunğan işğal etilgen Qırımnıñ prokurorı Natalya Poklonskaya hırsızlanmanıñ üç ola bilecek sebebini ayttı: para almaq maqsadınen hırsızlav, İbragimovnıñ ticariy faaliyeti ve «Qırım uquq qoruyıcı organlarına iftira atmağa istep, Qırımdaki vaziyetni kerginleştirmek maqsadınen yapılğan hırsızlav».

Kiyevde faaller Ervin İbragimov ve Qırımda zorbalıqnen ğayıp olğan diger ukrainler ve qırımtatarlarğa destek olaraq aktsiya teşkil etti. Tahminen 20 kişi Rusiye Federatsiyasınıñ Ukrainadaki elçiligine «Ervin qayda?» şiarınen levhalarnen keldi.

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

XS
SM
MD
LG