Link açıqlığı

Saatnıñ esas haberi

Kiyevde faaller Rusiyeni Qırımda adamlarnıñ ğayıp olmasını taqiq etmege çağırdı


Kiyevde faaller Ervin İbragimov ve Qırımda zorbalıqnen ğayıp olğan diger ukrainler ve qırımtatarlarğa destek olaraq aktsiya teşkil etti. Qırım.Aqiqat mühbiriniñ bildirgenine köre, tahminen 20 kişi Rusiye Federatsiyasınıñ Ukrainadaki elçiligine «Ervin qayda?» şiarınen levhalarnen keldi.

Arasında Qırım SOS cemaat teşebbüsi, Qırımtatar Milliy Meclisi temsilcileri, Rusiyede sabıq siyasiy mabus, qırımlı Gennadiy Afanasyev olğan uquq qoruyıcılar öz çıqışlarında Rusiyeni Qırımda adamlarnıñ zorbalıqnen ğayıp olmasını taqiq etmege çağırdı.

Aktsiya iştirakçileriniñ fikrince, bu meselege halqara cemaatçılıqnıñ diqqatını celp etmek kerek.

Aktsiya soñunda onıñ iştirakçileri levhalarnı elçilik qorasına taqtı. Bina qapalı edi, yanında turğan levhaçıq ise, bu yerde qurucılıq işleri alıp barılğanını bildire.

Ervin İbragimovnıñ hırsızlanması aqqında 2016 senesi mayıs 24-te haber peyda oldı. Rusiye Taqiqat komitetiniñ Qırım idaresi ğayıp olğan Qırım sakinini qıdırmağa başlağanını bildirgen edi.

Bağçasarayda hırsızlanğan Ervin İbragimovnıñ soy-sopları onıñ qaytarılması içün 1 million ruble bereceklerini ilân etti.

Rusiyege boysunğan işğal etilgen Qırımnıñ prokurorı Natalya Poklonskaya hırsızlanmanıñ üç ola bilecek sebebini ayttı: para almaq maqsadınen hırsızlav, İbragimovnıñ ticariy faaliyeti ve «Qırım uquq qoruyıcı organlarına iftira atmağa istep, Qırımdaki vaziyetni kerginleştirmek maqsadınen yapılğan hırsızlav».

Qırım işğal etilgen soñ yarımada territoriyasında adamlar, hususan qırımtatarlar ğayıp olmağa başladı. Bunen beraber, Rusiyege boysunğan Qırım taqiqat komitetinde «yarımadada qırımtatarlar kütleviy şekilde ğayıp olmağanını» bildireler.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG