İyül 26-da ukrain baykerler başlatqan «Ukraina ve Qırım birligi» motoyürüşi iyül 29-da işğal etilgen Qırım ile memuriy sıñırda, «Çonğar» kiriş/çıqış nezaret noqtası yanında yekünlendi.
Qırım.Aqiqat mühbiriniñ bildirgenine köre, ukrain baykerler kolonnanen ukrain ve qırımtatar bayraqları ile yürip keçti, yarımada qamaçavı aktsiyası keçirilgen Çonğar köyü yanındaki territoriyasını ziyaret etti, o yerde qamaçav faalleri mototsiklistler içün üyle aşını azırladı.
Yerli qırımtatar milliy meclisleriniñ temsilcileri motoyürüş iştirakçileri ile körüşti ve olarnıñ qırımtatarlarğa bergen diqqatı içün teşekkür bildirdi.
«Ukraina ve Qırım birligi» motoyürüşi Ujgorod şeerinde başlandı. Merasimniñ Facebook saifesinde baykerler böyle aktsiya vastasınen devletniñ birligini köstermege istegeni qayd etile.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
