Qırımtatar Milliy Meclisi reisi Refat Çubarov işğal etilgen Qırımnıñ Cenübiy federal okrugğa kirsetilmesine izaat berdi.
«Bugünki künden başlap Qırım federal okrugınıñ lâğu etilmesi ve «Qırım Cumhuriyeti ve Aqyar şeeriniñ» Cenübiy federal okrugğa kirsetilmesi bildire ki, Rusiye yuqarı siyasiy reberiyeti işğal etilgen Qırım içün diger, rusiyeli territoriyalarnıñ qaderini azırladı, qaysı birleri yekâne devlet siyasetini qabul ettirilecek obyektler ola, bu siyaset ömürge keçirilgende etnik ya da tarihiy çeşitlik, medeniy ya da til hususiyetleri tek bu territoriyanıñ «rus dünyası» standartlarına bütünley «uyğunlaştırılacağına» qadar üstüni örtecek», – dep yazdı Çubarov Facebook saifesinde.
Çubarovnıñ qayd etkenine köre, «Rusiyeni qarışıq künleri bekley».
İyül 28-de Rusiye prezidenti Vladimir Putin «Cenübiy federal okrug aqqında» fermannı imzaladı, bu okrugnıñ içine işğal etilgen Qırımnı kirsetti. Böyleliknen, 2014 senesi yarımadanıñ işğalinden soñ teşkil etilgen Rusiyede Qırım federal okrugı yoq etildi.
Vesiqada aytılğanına köre, böyle qarar «devlet ükümeti federal okrugları faaliyetiniñ effektivligini arttırmaq maqsadınen» qabul etildi.
Bundan da ğayrı, iyül 28-de Putin öz fermanınen işğal etilgen Aqyar gubernatorı Sergey Menaylonı istifağa çıqardı ve onı Sibir federal okrugına vekâletli temsilci vazifesine tayinledi. Menâylo yerine vaqtınca Dmitriy Ovsânnikov belgilendi.
Putinniñ diger fermanına binaen, yarımada işğal etilgen soñ Rusiye prezidentiniñ Qırımda vekâletli temsilcisi vazifesinde bulunğan Oleg Belaventsev Şimaliy Qavqaz federal okrugında prezidentniñ vekâletli temsilcisi olaraq tayinlendi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
