Link açıqlığı

Rusiye prezidenti Vladimir Putin «Cenübiy federal okrug aqqında» fermannı imzaladı, bu okrugnıñ içine işğal etilgen Qırımnı kirsetti. Böyleliknen, 2014 senesi yarımadanıñ işğalinden soñ teşkil etilgen Rusiyede Qırım federal okrugı yoq etildi.

Vesiqada aytılğanına köre, böyle qarar «devlet ükümeti federal okrugları faaliyetiniñ effektivligini arttırmaq maqsadınen» qabul etildi.

«Cenübiy federal okrugnı ve Qırım federal okrugını Cenübiy federal okrugğa deñiştirmek. Ustinov Vladimir Vasilyeviçni, onıñ eda etken vazifesinden boşatıp, Rusiye Federatsiyası prezidentiniñ Cenübiy federal okrugında vekâletli temsilcisi vazifesine tayinlemek», – dep aytıla fermanda.

Bunen beraber, Rusiye Federatsiyası ükümetine işbu fermannıñ işke tüşürilmesi boyunca kerekli tedbirlerni teşkil etmek, aktlarnı işbu fermanğa uyğan şekilge ketirmek avale etildi.

Rusiye Federatsiyası prezidentiniñ memuriyeti yolbaşçısına Rusiye prezidentiniñ vekâletli temsilcisiniñ apparatınıñ terkibi ve ştat miqdarını belgilemek avale etildi.

Böyle etip, fermanğa binaen, yañı tizilgen Cenübiy okrugğa Adıgeya Cumhuriyeti (Adıgeya), Kalmıkiya Cumhuriyeti, Qırım, Krasnodar ülkesi, Astrahan vilâyeti, Volgograd vilâyeti, Rostov vilâyeti, Aqyar kirdi.

Bundan da ğayrı, iyül 28-de Putin öz fermanınen işğal etilgen Aqyar gubernatorı Sergey Menaylonı istifağa çıqardı ve onı Sibir federal okrugına vekâletli temsilci vazifesine tayinledi. Menâylo yerine vaqtınca Dmitriy Ovsânnikov belgilendi.

Putinniñ diger fermanına binaen, yarımada işğal etilgen soñ Rusiye prezidentiniñ Qırımda vekâletli temsilcisi vazifesinde bulunğan Oleg Belaventsev Şimaliy Qavqaz federal okrugında prezidentniñ vekâletli temsilcisi olaraq tayinlendi.

Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.

XS
SM
MD
LG