İşğal etilgen Qırımnıñ Kreml tarafından tayinlengen prokurorı Natalya Poklonskaya saylavaldı tatilde buluna. Bu aqta o, yarımadanıñ Aqmeçit rayonını ziyaret etkende mühbirlerge bildirdi.
«Men endi tatildem ve saylavaldı kampaniyası çerçivesinde «Yedinaya Rossiya» partiyasından diger namzetlernen beraber regionlarnı ziyaret etem», – dep qayd etti o.
«Yedinaya Rossiya» partiyasınıñ Qırım bölüginiñ saytında qayd etile ki, Natalya Poklonskaya Aqmeçit rayonınıñ bir qaç köyüni ziyaret etti.
«Krasnoyarskoye (Doñuzlav – QA) ve Lenskoye (Dört Saqal – QA) köylerinde Natalya Vladimirovna yerli mektepler, bala baçğaları, hastahane müessiseleri ve Medeniyet evleri hadimlerinen körüşti. Krasnoyarskoye ambulatoriyası, yerli Medeniyet evini ziyaret etti, sakinlerniñ isteklerini diñledi», – dep aytıla beyanatta.
Moskvağa boysunğan Qırım prokuraturasınıñ saytında Poklonskayanıñ tatili aqqında malümat bildirilmey.
İyül 14-te «Yedinaya Rossiya» partiyasınıñ Qırım regional bölüginiñ nevbetteki konferentsiyasında Rusiye Devlet Dumasına namzetler resmiy olaraq taqdim etildi. Toplaşuvnıñ qararında binaen, cedvel başında Rusiyege boysunğan Qırım yolbaşçısı Sergey Aksönov oldı. Namzetler arasında Qırımnıñ rusiyeli prokurorı Natalya Poklonskaya da bar.
Rusiye Devlet Dumasına nevbetteki saylavlarnıñ bu sene sentâbr 18-ge planlaştırılğan. İlk sefer rey berüv işğal etilgen Qırımda da keçirilecek.
Rusiye Devlet Dumasına Qırım territoriyasında saylavlarnıñ keçirilmesini ukrain ükümeti takbih etti.
Ukraina Tışqı işler nazirligi ilân etti ki, azırlanılğan rey berüv qanunsızdır, deputatlarğa Qırım namzetlerine qarşı ise, mütenasip tedbirler yapılacaq. Kiyevdeki Qırım Muhtar Cumhuriyeti prokuraturası, öz nevbetinde, Qırımda saylavlarnıñ teşkil etilmesinde iştirak etken şahıslarğa qarşı cinaiy işler açılacağını bildirdi.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlandıra.
