Frenkistan senatorı işğal etilgen Qırımğa ketecek parlamentariyler eyyetinde iştirak etmekten vazgeçti, dep añlattı mühbirlerge Rusiye Devlet Dumasınıñ Mustaqil Devletler Birligi, Avrasiya integratsiyası ve vatandaşlarnen bağ meseleleri boyunca komitetiniñ reisi Leonid Slutskiy. Bu aqta «RİA Novosti» (Qırım) agentligi bildire.
«Evel eyyet terkibine 12 kişi kirecegi planlaştırılğan edi, amma soñki an senatorlardan biri iştirak etmekten vazgeçti, bu aileviy sebeplerden olğanını ayttı», – dedi o.
Slutskiyniñ sözlerine binaen, Tyerri Marianiniñ yolbaşçılığında frenk senatorlarınıñ işğal etilgen Qırımğa ziyareti iyül 29-dan 31-ge qadar planlaştırıla.
Kremlge boysunğan Qırım parlamentiniñ matbuat hızmeti bildirdi ki, ziyaretniñ ilk künü frenk parlamentariyleri Mirnoye köyüne baracaq, o yerde «Qırmızı» toplama lageri» abide kompleksini baqacaq. İyül 29-da Rusiyege boysunğan işğal etilgen Qırım yolbaşçısı Sergey Aksönov, ameldeki Qırım parlamentiniñ yolbaşçısı Vladimir Konstantinov, işğal etilgen yarımadanıñ prokurorı Natalya Poklonskaya ve Rusiye Federatsiyası prezidentiniñ Qırımda vekâletli temsilcisi Oleg Belaventsev ile körüşüvlerniñ keçirilmesi planlaştırılğan.
İyül 30-da eyyet Aqyarnı ziyaret etecek ve Rusiye Federatsiyasınıñ Arbiy ordu flotu kününiñ qayd etilmesinde iştirak etecek.
Ukraina Tışqı işler nazirligi iyül 25-te muracaatnı derc etti, vesiqada müessise ecnebiy vatandaşlarnı ve vatandaşlığı olmağan şahıslarnı Qırımğa qanunsız ziyaretlerden tenbiyeley.
Bundan evel Frenkistan Tışqı işler nazirligi parlamentariylerniñ ola bilecek Qırımğa ziyaretini takbih etti.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
