Link açıqlığı

Saatnıñ esas haberi

Qırımda mahkeme eki ay keçken soñ Sürgünlik künü matem mitinginiñ keçirilmesi yasaq etilmesine qarşı şikayetni baqacaq – Smedlâyev


Zair Smedlâyev
Zair Smedlâyev

İyül 26-da, salı künü işğal etilgen Qırımnıñ Rusiyege boysunğan apellâtsion mahkemesi mayıs 18-de Krasnoperekopsk rayonında qırımtatar halqınıñ sürgünligi künü matem mitingi keçirilmesiniñ yasaq etilmesine qarşı şikâyet arizasını baqacaq. Mayıs 17-de qabul etilgen rayon mahkemesiniñ mütenasip qararına qarşı şikâyet arizasını Krasnoperekopsk regional meclisiniñ yolbaşçısı Saniye Ametova birden onıñ qabul etilgen soñ berdi. Bu aqta malümatnı Qırım.Aqiqatqa Qırımtatar Qurultayınıñ Merkeziy saylav komissiyasınıñ reisi Zair Smedlâyev bildirdi.

«Mayıs 17-de mahkeme qararı qabul etildi: olar qaqarnı alğan soñ, olar birden, belgilengen müddet içinde şikâyet arizasını berdiler. Bu mayısnıñ 20-ci künleri edi», – dep ayttı Zair Smedlâyev.

Qırımtatar Qurultayınıñ Merkeziy saylav komissiyasınıñ reisi şikâyetniñ böyle keç baqılmasınıñ manasız olğanını qayd etti. Mayıs 18-de Krasnoperekopskta mahkeme qararı sebebinden qırımtatarlar matem mitinginiñ keçirilmesini lâğu etmek mecbur oldı: o vaqıt tek çiçekler qoyuldı.

«Bir variant – şikâyet arizasını qanaatlendirmeycekler. Hayaliy variant ise – Krasnoperekopsk rayon mahkemesi qanunsız red etkeni aqqında qarar çıqaracaqlar. Endi bütün bu şeylerni qanunğa nasıl ketirmek mümkün? Nasıl etip, 2016 senesi mayıs 18 mitingini keçirmek? Vaqıt maşnasını çalıştırmaqmı? Gerbert Wellsni celp etmekmi?», – dep qoştı Qırımtatar Qurultayınıñ Merkeziy saylav komissiyasınıñ reisi.

Onıñ malümatına binaen, toplaşuvnıñ keçirilmesi saat 8:45-ke belgilengen. Mahkemege bazı qırımtatar faalleri de kelmege planlaştıra.

Bundan evel bildirilgenine köre, Qırımda regional meclisler, bu cümleden, Krasnoperekopskta ve Sudaqta, Rusiyege boysunğan ükümetten mayıs 18 qırımtatar halqınıñ sürgünligine bağışlanğan matem merasimlerniñ keçirilmesini uyğunlaştırması boyunca red etüvlerni alğan edi.

Mayıs 18 – Qırımdan qırımtatar halqı sürgünliginiñ qurbanlarını añma künüdir. Bu kün 1944 senesi yarımadadan Orta Asiyağa qırımtatarlarnen ilk eşelon yollanıldı. Umumen olaraq, 180 biñden ziyade insan sürgün etildi.

Er sene Qırımda matem kününe bağışlanğan kütleviy merasimler, bu cümleden Qırım paytahtınıñ merkezinde Meclis tarafından teşkil etilgen matem mitingi keçirile edi. Amma Qırım Rusiye tarafından işğal etilgen soñ Aqmescit merkezinde bu kibi merasimlerniñ keçirilmesi yasaq oldı.

XS
SM
MD
LG