Link açıqlığı

Saatnıñ esas haberi

Lvovda Mustafa Cemilev aqqındaki fotosergi açıla


İyül 25-te, bazarertesi künü Lvov şeerinde qırımtatarlarnıñ lideri aqqındaki «Mustafa Cemilev – insan serbestligi ve aqlarınıñ boysunmağan qorçalayıcısı» fotosergisi taqdim etilecek. Bu aqta «Qırım SOS» cemaat teşebbüsi bildire.

Fotosergi iyül 25-ten avgust 7-ge qadar Lvov tarihiy müzeyinde devam etecek.

«Qırım SOS» taqımında bildireler ki, Mustafa Cemilevniñ tercimeialı, 15 yıllıq sovet apishaneleri ve lagerlerinde bulunması, onıñ boysunmaması ve ahlâqı, qırımtatarlarnıñ liderini Leh Valensa ve Vatslav Gavel kibi belli şahıslarnen bir sırağa qoya.

«Mustafa Cemilevniñ şahsiyeti SSCB-de dissident areketi, qırımtatar halqınıñ Qırımğa avdet aqqı içün küreşi, demokratik Ukrainanıñ yañıdan tiklenilmesi ve 2013/2014 seneleri Maydanda narazılıq areketinde iştirak etüv, ve Qırımnıñ Rusiye tarafından işğal etilüvi ve Ukrainağa qarşı zorbalıq vaqtındaki vaqialarnıñ qısqaca tasvir etilmesinen taqdim etile», – dep qayd eteler «Qırım SOS»-ta ve Mustafa Cemilevni «qırımtatar milliy areketiniñ ikonası», dep adlandıralar.

Mustafa Cemilev – qaderi qıyın olğan insan, planlarını deñiştirgen ve büyük sovet repressiv sistemasını «oñaytsız» vaziyetke ketirgen insandır.

Daa yaş olğanda o, «Qırımtatar yaşlar birligini» teşkil etti. Teşkilât halqnıñ tarihiy vatanına avdet olunması içün küreşe edi, bunıñ içün sovet organları tarafından yasaq etildi.

1963 senesi mahkeme Mustafa Cemilevni ilk sefer apiske qapattı. 1975 senesi nevbetteki esnas devamında o, 303 kün açlıq tuta edi, ve onı on ay devamında zond vastasınen mecburen aşata ve glükoza sança ediler. Antisovet faaliyeti içün dissident beş kere mahküm etilgen. Umumen olaraq, Mustafa Cemilev apishaneler ve sürgünlikte tahminen 15 yıl bulundı.

Perestroyka vaqtında Mustafa azatlıqqa qavuştı ve 80-ci seneleriniñ soñunda qorantasınen Qırımğa qayttı. 1991 senesi o Meclis reisi vazifesine saylanıldı. O, 22 yıl devamında, 2013 senesi küzge qadar bu organnıñ yolbaşçısı edi.

2014 senesi vaqialarından soñ rusiyeli ükümet Mustafa Cemilevge Rusiye Federatsiyası ve onıñ nezaretinde bulunğan Qırım territoriyasına kirişni yasaq etti.

XS
SM
MD
LG