Link açıqlığı

«Ğalipler taqımınıñ» areketleri olarğa daa evel qoltutqan insanlarnıñ nefretini doğura, eki yıl evelsi olarğa işanğanlarnıñ ise olardan közü qayttı.

Ebet,2014 senesi «ğalipler taqımı» «yeşil adamçıqlar» yardımınen uruşta yeñdi, amma şimdiki qırımlılarnıñ aqıl ve canları cenkinde yuttura. Kreml «ğalipler taqımından» bu mefküriy cenkte ğalebe qazanmasını talap etken edi, çünki eki yıl evel olğan uruşta «ğalipler taqımı» qoqlalar kibi qullanıldı. Al-azırda Qırımdan kelgen biñlerce şikâyetler Rusiye prezidentiniñ Memuriyetini bastı. Tabiiy ki, bunıñ talili yapıla ve «ğalipler taqımı» nege yarağanına baqıla.

Aynı vaqıtta, Qırımnıñ ealisi pek açuvlana. Halq fuqare oldı. Köy hocalığı ve sanayınıñ canlandırılması yerine «ğalipler» Qırımnıñ mal-mülkini özara bölmege devam eteler. Bozmağa doğğanlar bir şey yapıp olamay. İçtimaiy ağlarda «ğalipler taqımına» sıq-sıq «bozucılar taqımı» denilmege başladı.

Qırım iqtisadiyatını inkişaf ettirmek yerine «ğalipler taqımı» Moskvada yañı-yañı paralar istey. «Altın tanaçıq» («Zolotoy telenok») eserindeki Panikovskiy aqlıma kele. Klassik olğan bu eserniñ daa bir belli ifadesini hatırlayıq: «Pıçıñız! Pıçıñız, Şura! Pıçıñız!», amma bu artıq bücetten alınğan paralar aqqında...

Qavehaneler boş, eskiden iyül ayında qavehanelerde boş masa tapmaq zor edi

cyberhunta saytında derc olğan vesiqada Aksenov qırımlılarnıñ açuvından ve «optimizm qalmağanından» şikâyet etip, Qırımnıñ maliye etilmesini qısqartmamağa rica ete. «Bizge köre, federal bücet şekillenmesinde olğan bütün qıyınlıqlarğa baqmadan, Rusiyeniñ genç cumhuriyetimizge berilgen para qısqartılmamalı. Rusiye Qırımnıñ Rusiye sakinlerini baqa işançını bozmamalı», – dep ayta Aksenov. «Bücetten berilgen paranıñ qısqartılması Qırımdaki yaşayış keyfiyetine menfiy tesir ete. Vaziyetni kontrol altında tutacağımızda eminmiz. Amma aynı vaqıtta Qırımnıñ Rusiye vatandaşları açuvlanğanından ve artıq optimist olmağanından qasevetlenemiz. Al-azırda közü qaytqan insanlarnıñ sayısı 34% teşkil ete ve bu raqam arta», – dep şikâyette buluna Aksenov. – Qırımnıñ Rusiye ealisini tüşünsek, Qırım cumhuriyetiniñ Rusiye vatandaşlarında peyda olğan qorqu ve eminsizlikni yeñermiz. Qırımnıñ sakinleri ukrain keçmişini ve rus kerçeklerini qıyaslamağa başlaylar, bunıñ ise menfiy aqibetleri ola bile».

«Ğalipler taqımı» Kremlni qorquzmağa başladı...

Bu künleri yalı boyundaki qasabalardan birinde oturğan torunım ile Skype vastasınen laf ettik. Açuvlana ve iç memnün degil. Yıllardır mısır sata. 2013 senesi künde üç ve atta dört qutu mısır satqan edi. Yahşı para qazana edi, yıl boyunca çoq balalı qorantasını baqmağa yete edi. Şimdi ise künde bir qutu bile satılmay! Eskiden alğan fiyatınıñ eki qatından sata edik, dey. Şimdi ise 50 rubleden alıp, pişirilgen mısırnı 80 rubleden satamız, amma kene de bazar yoq.

Başqaları da şikâyet ete, dep ayta. Qavehaneler boş, eskiden iyül ayında qavehanelerde boş masa tapmaq zor edi. Demek ki, raatlanmağa kelgenlerniñ maddiy vaziyeti pek yahşı degil. Qırımda nefaqa alğanlarnı ve devlette çalışqanlarnı endi aytmayıq!

Bu sebepten Qırımda adiy insanlar bu «ğaliplerni» tezce Devlet dumasına – Qırımdan uzaq bir yerge alsınlar isteyler!!!

Zarema Seitablayeva, qırımlı, bloger

«Bloglar» rubrikasında bildirilgen fikir-tüşünceler müelliflerniñ noqtaiy-nazarını aydınlatıp, muarririyetniñ baqışları ile aynı olmaması mümkün

XS
SM
MD
LG