Qırımtatar Milliy Meclisiniñ reis muavini Ahtem Çiygoznıñ «fevral 26 işi» boyunca mahkeme avgust 2-de devam etecek, dep bildire Meclis reisiniñ birinci muavini Nariman Celâl.
«Mahkeme adliyeci Lesovoynıñ cinaiy işni toqtatmaq muracaatını, cinayet tertibi olmağanı ve cezanıñ deñişmesi sebebinden, lâğu etti», – dep yazdı o Facebook saifesinde.
«Prokuror Dombrovskiyniñ muracaatınen mahkeme Ahtem Çiygoznen nevbetteki toplaşuvlarnıñ video bağı rejiminde keçirilmesi aqqında qararnı sanki zararlanğanlarnıñ havfsızlığı içün alındı», – dep ayttı Celâl.
O qayd etti ki, Çiygoznıñ imayesi «fevral 26 işiniñ» bölünüvi aqqında qararına qarşı şikâyet arizasını berecek.
İyül 20-de Aqmescitte «fevral 26 işi» boyunca qapalı toplaşuv keçirildi. Toplaşuvda davanı eki ayrı işke bölmege qarar alındı, bunen beraber, üç qabaatlanğan kişi, yani Ahtem Çiygoz, Ali Asanov ve Mustafa Degermenciniñ apiste bulunma müddeti oktâbr 8-ge qadar uzattırıldı.
Adliyeci Cemil Temişev bildirdi ki, mahküm etilgenler Rusiyege boysunğan Qırım Yuqarı mahkemesiniñ «fevral 26 işiniñ» eki ayrı işke bölünüvi aqqında qararına qarşı 10 kün içinde şikâyet ete bile.
Qırım Rusiye tarafından işğal etilgen soñ yarımadada Rusiye uquq qoruyıcıları Ukraina topraq bütünligine qoltutqan ve Qırımnıñ şimdiki yolbaşçısı Sergey Aksenov yolbaşçılığında «Rus birligi» firqasınıñ faallerine qarşı çıqqan qırımtatar faallerini mahküm etmege başladılar.
«Memorial» uquq qoruyıcı merkezi Rusiyede «Fevral 26 işi» boyunca qabaatlanıp apiste bulunğan Ahtem Çiygoz, Ali Asanov ve Mustafa Degermencini siyasiy mabus olaraq tanıdı.
2016 senesi fevral ayında Rusiyege boysunğan Qırım Yuqarı mahkemesiniñ toplaşuvında bu işni qoşma taqiqatqa yollamaq qararı alındı.
Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
